ƏLİ BAYRAMLIDA TƏBİİ FƏLAKƏTİN NƏTİCƏLƏRİ AZƏRBAYCAN PREZİDENTİNİN TAPŞIRIĞI İLƏ İNTENSİV SURƏTDƏ ARADAN QALDIRILIR

11.10.2006 [21:45]
Çap et
A⁺ A^-

Fövqəladə Hallar Nazirliyinin ictimaiyyətlə əlaqə idarəsindən AZƏRTAC-a daxil olmuş məlumatda deyilir ki, oktyabrın 10-da axşam saat 9-10 radələrindən etibarən bir neçə saat ərzində yağan güclü leysan yağışları nəticəsində Əli Bayramlı şəhərində 100-dən yuxarı ictimai yaşayış binasının zirzəmilərini, 300-dən yuxarı xüsusi evlərin həyətlərini su basmış, elektrik, su və qaz təminatında problemlər yaranmışdır. Avtomobillərin hərəkəti üçün yeraltı keçidlərdə sel asfaltı dağıtmışdır. Təbii fəlakət nəticəsində bir ev qəza vəziyyətinə düşmüş, bir evin isə divarı uçmuşdur. Hacı Qəhrəmanlı və Bayramlı qəsəbələrinə də leysan xeyli ziyan vurmuşdur. Bakı-Astara dəmir yolu xəttinin alt hissəsinin 50 metrdən yuxarı məsafəsini sel suları yuyub aparmışdır.

Azərbaycan Prezidenti İlham Əliyevin tapşırığına əsasən hadisə yerində olan Baş nazirin müavini Abid Şərifov, fövqəladə hallar naziri Kəmaləddin Heydərov, “Azərenerji” Səhmdar Cəmiyyətinin prezidenti Etibar Pirverdiyev, “Azəriqaz” Səhmdar Cəmiyyətinin prezidenti Əlixan Məlikov, “Azərsu” Səhmdar Cəmiyyətinin prezidenti Nizaməddin Rzayev yaranmış problemin aradan qaldırılması üçün konkret göstərişlər vermişlər.

Fövqəladə hallar naziri, general-polkovnik Kəmaləddin Heydərovun əmrinə əsasən nazirliyin mülki müdafiə qoşunlarının 300 nəfər xilasediçisindən ibarət şəxsi heyəti, iri su nasosları və digər avadanlıq, 100-dən çox çadır və isti örtüklər, rezin qayıqlar, tibb ləvazimatı, Yanğın Təhlükəsizliyi Xidmətinin Bakı, Əli Bayramlı və ətraf rayonlardakı yanğın texnikası və şəxsi heyəti hadisə yerinə gətirilmişdir. Həmin qüvvələrin və yerli icra orqanlarının qüvvəsi ilə təbii fəlakətin nəticələri sürətlə aradan qaldırılır. Nazirliyin yaratdığı xüsusi komissiya dəymiş ziyanın müəyyənləşdirilməsinə başlamışdır. “Azərenerji” və “Azəriqaz” səhmdar cəmiyyətlərinin yerli qurumlarının səyi nəticəsində şəhərə elektrik, qaz və su verilməsi məsələsi saat 18 radələrində öz həllini tapmışdır.

ƏLİ BAYRAMLIDA TƏBİİ FƏLAKƏTİN NƏTİCƏLƏRİ AZƏRBAYCAN PREZİDENTİNİN TAPŞIRIĞI İLƏ İNTENSİV SURƏTDƏ ARADAN QALDIRILIR

MÜƏLLİFLƏ ƏLAQƏ

Bölmənin digər xəbərləri