Əlillik üzrə etibarlı məlumat inklüziv şəhərlərin qurulması üçün zəruridir
Bakı, 20 may, AZƏRTAC
Əlillik üzrə ayrılmış məlumatlar inklüziv şəhər planlaşdırılması və əlilliyi olan şəxslərin hüquqlarının təmin olunması üçün əsas vasitədir. Əlilliyi olan şəxslərin real ehtiyacları və şəhərlərdə qarşılaşdıqları maneələr barədə etibarlı məlumatlar olmadan düzgün planlaşdırma aparmaq mümkün deyil.
AZƏRTAC xəbər verir ki, bunu “Əlilliyi olan Şəxslərin Müstəqil Həyat Mərkəzi” İctimai Birliyinin sədri Aydın Xəlilov WUF13 çərçivəsində keçirilən Əlilliyi olan şəxslərin hüquqları üzrə dəyirmi masada deyib.
O bildirib ki, Dayanıqlı İnkişaf Məqsədləri (SDG 11) və Yeni Şəhər Gündəliyi üzrə öhdəliklərin icrasında əsas problemlərdən biri əlillik üzrə ayrılmış məlumatların kifayət qədər toplanmamasıdır. Yalnız pandusların sayını qeyd etmək kifayət deyil, həmin infrastrukturun praktik istifadəyə yararlı olub-olmaması da qiymətləndirilməlidir. Əlilliyi olan şəxslərin ictimai nəqliyyata, təhsil, səhiyyə və digər xidmətlərə çıxış imkanlarının da nəzərə alınmasının vacibliyi diqqətə çatdırılıb.
Bildirilib ki, əlilliyi olan şəxslər yalnız məlumat toplanmasının obyekti deyil, qərarların hazırlanması prosesinin iştirakçısı olmalıdırlar. Etibarlı məlumat olmadan effektiv siyasət, əlillik üzrə ayrılmış məlumat olmadan isə inklüziv şəhərlər qurmaq mümkün deyil.
Bölmənin digər xəbərləri
