Erməni tarixi belə saxtalaşdırılır və qədimləşdirilir, hər sahədə “birincilik” belə qamarlanır
Bakı, 7 oktyabr (AZƏRTAC). ABŞ-ın Merilend ştatının qubernatoru Martin O'Melley Ermənistanın “müstəqilliyi” - əslində İrəvan vilayətinin qubernatorunun səyləri ilə lap bu yaxınlarda gözümüzün qarşısında rüsvaycasına tarixə çevrilmiş bir “müstəqillik” münasibətilə sentyabrın 30-da təbrik proklamasiyası imzalamışdır. Hamıya məlumdur ki, dövlətin müstəqilliyinin əsas elementlərindən və rəmzlərindən biri gömrük, habelə dövlət sərhədlərinin mühafizəsidir. Ermənistan öz sərhədlərini müstəqil mühafizə etmək iqtidarında olmadığı üçün bu funksiyadan imtina etmişdir. “Ermənistan gömrüyü” də bundan sonra təbəssümlə xatırlanacaqdır. Artıq keçmiş Ermənistan dövlətinin vahid rubl zonasına qoşulmasının mümkünlüyü barədə söhbətlər gedir ki, bu da təəccüblü deyildir.
Bununla belə, Ermənistanın “müstəqilliyi” Merilend ştatının sadəlövh qubernatorunun gözünə ABŞ-ın hay diasporunun kül üfürdüyü yeganə yalan deyildir. Proklamasiyanın artıq ikinci sətrində deyilir ki, Ermənistan guya 301-ci ildə xristianlığı qəbul etmiş ilk millətdir. Məlum olduğu kimi, 301-ci ildə müstəqil Ermənistan mövcud deyildi. Bura Parfiyadan vassal asılılığında olan ərazi idi və başında Parfiya Arşakilər sülaləsindən olan çar III Tiridat dayanmışdı. Edessa çarı VIII Abqar arameydilli Osroyenada (Edessa) dövlət dini kimi xristianlığı parfiyalı III Tiridatdan xeyli əvvəl qəbul etmişdi. Bu, III əsrin lap əvvəllərində, yəni III Tiridatın “Ermənistan” coğrafi adı ilə ona etibar edilmiş vassal əyalətə 301-ci ildə xristianlığı qəbul etdirməsindən, demək olar, yüz il tez baş vermişdir. Xristianlıq Edessadan sonra, Ermənistandan isə əvvəl Eritreya, Efiopiya, Qafqaz Albaniyası (Azərbaycan) və İberiyada (Gürcüstan) da rəsmi din kimi qəbul edilmişdir. Odur ki, ermənilər dünyanın başını piyləmək əvəzinə, yaxşı olar, başlarını aşağı salıb növbəyə dayansınlar və ən yaxşı halda altıncı olsunlar.
Qubernator Martin O'Melleyin uğursuz proklamasiyasının dördüncü sətrində deyilir ki, bütün respublikalar arasında SSRİ-dən müstəqilliyini guya ilk dəfə 1991-ci il sentyabrın 21-də Ermənistan elan etmişdir. Əvvələn, madam ki, söhbət respublikalardan düşdü, onda birinci Naxçıvan ASSR olmuşdur. O, 1990-cı ilin qanlı 20 Yanvar faciəsindən dərhal sonra SSRİ-nin tərkibindən çıxdığını elan etmişdir.
İkincisi, 1990-cı il martın 11-də Litva SSR Ali Soveti dövlət müstəqilliyinin bərpa edilməsi barədə qanunvericilik aktı qəbul etmişdir. Elə həmin il mayın 4-də Latviya SSR Ali Sovetinin üzvləri analoji Bəyannamə qəbul etmişlər, 1988-ci il noyabrın 16-da Estoniya SSR-in suverenliyi haqqında bəyannamə qəbul olunduqdan sonra bu istiqamətdə irəliləyən estoniyalı həmkarlar isə 1991-ci il avqustun 20-də müstəqil olduqlarını təsdiq etmişlər. Moldova SSR Ali Soveti 1991-ci il avqustun 27-də, Azərbaycan SSR-in parlamenti isə avqustun 30-da suverenlik haqqında Bəyannamə qəbul etmişlər.
Üçüncüsü, erməni lobbiçiləri o dərəcədə savadsızdırlar ki, öz tarixlərini də bilmirlər. 1991-ci il sentyabrın 21-i müstəqillik tarixi deyildir, referendumun keçiridiyi gündür. Ermənistanın müstəqilliyi referendumdan iki gün sonra, sentyabrın 23-də elan edilmişdir. Ermənistan SSR Ali Soveti müstəqillik bəyannaməsini isə hələ 1990-cı il avqustun 23-də qəbul etmişdir. Buna baxmayaraq, bu işdə də ermənilərə birincilik düşmür.
Kiçik bir sənəddə bu qədər xəta! Axı, vaxt gələcək, “bitərəf mənbə” kimi buna istinad edəcəklər. Hazırda Amerika səfiri Henri Morgentaunun qələmindən çıxmış “bitərəf mənbələrə” istinad etdikləri kimi. Səfirin köməkçisi isə məhz “Tələt paşa teleqramları” adlı məşhur saxta sənədlərin müəllifi Aqop Andonyandır.
Ermənistanda tarix elmi bax belə zorakılığa məruz qalır.
Bölmənin digər xəbərləri
