Ermənilərin xam xəyalları və ya Ermənistanın uğursuzluqlarının təqsirkarı kimdir?
Bakı, 2 may (AZƏRTAC). “Azərbaycan Ermənistanda yaranmış daxili siyasi vəziyyətin gərgin olmasından istifadə etməyə və Ermənistan əhalisi arasında vahimə yaymağa çalışır”.
Qarabağ müharibəsinin “veteranı” kimi qələmə verilən Manvel Yegiazaryan bu fikri yaxın vaxtlarda Ermənistan tərəfindən atəşkəs rejiminin pozulması nəticəsində Azərbaycan ordusunun zabitinin həlak olması ilə əlaqədar “Armtoday” saytına verdiyi müsahibədə söyləmişdir.
Beləsinə nə deyəsən? Son illərdə Ermənistanda vəziyyət həqiqətən gərgindir. Bu, ölkədə sosial-iqtisadi vəziyyətin ağırlaşması ilə əlaqədardır. Lakin əgər Azərbaycan separatçılar tərəfindən onun öz ərazisində qoşunların təmas xəttində açılan atəşləri cavab atəşi ilə susdurursa, bunun Ermənistan əhalisi arasında necə “vahimə yaya biləcəyini” başa düşmək olmur. Aydındır ki, məntiqə və sağlam düşüncəyə zidd olan bu cür iddialar erməni ictimaiyyətinin diqqətini ölkədə keçiriləcək parlament seçkilərində irimiqyaslı saxtalaşdırmağa hazırlıqdan yayındırmaq üçün lazımdır.
Lakin Yegiazaryanın bəyanatında bir məqam da diqqəti cəlb edir. O, son vaxtlar Ermənistanın Azərbaycandan xeyli geri qalmasını etiraf edir. O, şikayətlənərək deyir: “Onlar görürlər ki, ölkəmiz beynəlxalq aləmdə öz mövqelərini itirir, biz daxildən zəifləyirik”. Bu etiraf, əlbəttə, diqqətəlayiqdir, lakin Yegiazaryan kimilər heç cür görmək istəmirlər ki, bu vəziyyətin təqsirkarları yalnız Ermənistanın hakim dairələri ola bilər. Doğrudan da, axı bu dövləti idarə edən Azərbaycan deyil, ermənilərin özləridir. Ermənistanın qeyri-konstruktiv və təcavüzkar siyasəti onun özünü çıxılmaz vəziyyətə salmışdır, lakin bu fakt onların məddahlarının Ermənistanın düşdüyü bəlalara görə başqalarını günahlandırmasına mane olmur.
Bununla bərabər, Ermənistanda hələ sağlam düşüncəli insanlar vardır, onlar görürlər ki, Ermənistanın üzləşdiyi bəlaların səbəbləri öz hakim dairələrinin fəaliyyət qabiliyyətli olmamasıdır. Məsələn, iqtisadçı Qrant Baqratyan Ermənistan Prezidenti Serj Sarkisyana açıq məktubunda (həmin məktubun mətni “Armtoday” saytında dərc edilmişdir) yazır ki, son 5 ildə ölkə iqtisadi yoxsulluq indeksinə görə 32-ci yerdən 43-cü yerə düşmüşdür. Erməni eksperti qeyd edir ki, ölkədə təbii qaz istehlakçılara süni şəkildə artırılmış qiymətə satılır. Belə ki, Ermənistan qazın 1000 kubmetrini Rusiyadan 180 dollara aldığı halda öz əhalisinə 450 dollara satır. Q.Baqratyan yazır ki, S.Sarkisyanın son 5 ildə dövlət büdcəsinin 13,8 faiz artırılmasını böyük bir uğur kimi təqdim edərək lovğalanması ayıbdır. Konkret rəqəmlərlə təsdiqlənən vəziyyətin ağırlığını başa düşən Q.Baqratyan Sarkisyanın gətirdiyi rəqəmlərə istehza edərək yazır: “Bu halda son 5 ildə Azərbaycan büdcəsinin 2,5 dəfə, Gürcüstan büdcəsinin (dollar ifadəsində) iki dəfədən çox, dünya iqtisadiyyatının 1,4 dəfə artması boş şeydir”.
Ermənistan mətbuatı bizi antierməni təbliğatında təqsirləndirmək üçün hər dəfə Azərbaycanın hərəkətlərində irad tutmağa bir məqam axtarır. Məsələn, Azərbaycan Dövlət Neft Şirkətinin bu yaxınlarda “Aqon” şirkəti ilə imzaladığı sazişin şərtlərinə görə, ölkəmiz iri şahmat turnirlərini maliyyələşdirəcəkdir. Bu məsələ erməni təbliğat və təşviqat nümayəndələrini çox əsəbiləşdirir. Bundan əlavə, həmin sazişə görə, gələcəkdə idmanın bu növü üzrə dünya birinciliklərinin Azərbaycanda keçirilməsi nəzərdə tutulur. Erməni mətbuatı isə bunu Ermənistana qarşı yönəlmiş addım hesab edir. Panorama.am saytı bu günlərdə Ermənistan Şahmat Federasiyasının vitse-prezidenti Smbat Lputyan ilə müsahibədə bu faktı Ermənistan üçün problem kimi qələmə verməyə çalışmışdır. Beynəlxalq Şahmat Federasiyasının prezidenti Kirsan İlyumjinovun fikrincə, Azərbaycan şahmatın nazirliklər səviyyəsində deyil, prezident səviyyəsində inkişaf etdiyi yeganə ölkədir. Saytın jurnalisti vitse-prezidentin bu barədə fikrini soruşmuş və S.Lputyan belə cavab vermişdir: “İlk növbədə deməliyəm ki, Azərbaycan həqiqətən uzun illər boyu şahmatın inkişafı üzrə ardıcıl iş aparır və məhz bunun sayəsində bu gün onun yüksək səviyyəli üç şahmatçısı vardır. Bizim qonşu ölkə şahmata kifayət qədər sanballı sərmayə qoyur, idmanın bu növünün fəal inkişafını dəstəkləməyə çalışır, bu da öz növbəsində, 1980-ci illərdə Kasparov Bakıda yaşayanda və dünya çempionu olanda olduğu kimi, bu gün isə Rəcəbov, Məmmədyarov, Həşimov kimi şahmatçılar ölkənin tanınmasına kömək edir”.
Erməni təbliğatçıları heç cür başa düşə bilmirlər ki, Azərbaycanın siyasi, iqtisadi, sosial və digər fəaliyyəti yalnız onun inkişafına və möhkəmlənməsinə yönəlmişdir. Lakin əgər Ermənistanın hakim dairələri özlərinin perspektivsiz siyasəti ucbatından öz cəmiyyətlərini böhrana aparırsa, buna görə Azərbaycan heç cür təqsirkar ola bilməz. Ermənistan ictimaiyyətinin nümayəndələrinin bunu başa düşməsinin vaxtı çatmışdır. Onlar erməni dövlətinin səhvlərini Azərbaycanın ayağına yazmaqla öz vətəndaşlarını daim çaşdıra bilməyəcəklər. Məlum aforizmdə deyildiyi kimi, şirin xəyallarla yaşamağın düşər-düşməzi olar.
Elşən Şahbalayev
AZƏRTAC-ın müxbiri
Bölmənin digər xəbərləri
