Ermənistan rəhbərliyi hazırkı şəraiti doğru dəyərləndirsə, tezliklə sülh sazişinin bağlanmasının şahidi olacağıq - ŞƏRH
Bakı, 11 iyul, AZƏRTAC
Birləşmiş Ərəb Əmirliklərinin Əbu-Dabi şəhərində Azərbaycan Respublikasının Prezidenti və Ermənistanın Baş naziri arasında keçirilən görüş Azərbaycan-Ermənistan dövlətlərarası münasibətlərin normallaşması baxımından müsbət dəyərləndirilə bilər. Xüsusilə görüşün konstruktiv şəraitdə keçməsi və tərəflər arasında sülhə aparan yolun davam etdirilməsi barədə razılığın əldə olunması uğuru bir daha təsdiqləyir.
Bu fikirləri AZƏRTAC-a açıqlamasında İslahatçı Qadınlar və İnnovasiyalar İctimai Birliyinin sədri Vüsalə Hüseynli səsləndirib
Onun sözlərinə görə, sülh gündəliyi, xüsusilə, sərhədlərin delimitasiyası, Zəngəzur dəhlizinin açılması və sülh sazişi ilə bağlı çox ciddi və məzmunlu müzakirələrin aparılması iki ölkə rəhbərliyinin bu istiqamətdə uğur əldə etmək əzmini bir daha sərgiləyir: "Əbu-Dabidə keçirilən danışıqların müxtəlif işçi qrupları formatında və daha yüksək səviyyələrdə davam etdirilməsi üçün ümumi razılığın əldə olunması müsbət haldır. Ermənistanın Baş naziri hazırkı şəraiti də doğru dəyərləndirməyi bacarsa, tezliklə sülh sazişinin bağlanmasının şahidi olacağıq",- deyə o qeyd edib.
Bölmənin digər xəbərləri
