Etirazçılar Təl-Əvivdə magistral avtomobil yolunu bağlayıblar
Bakı, 14 mart, AZƏRTAC
İsrail hakimiyyətinin Qəzza sektorunda saxlanılan girovların azad edilməsi üçün müqavilə imzalamasını tələb edən etirazçılar ölkənin əsas avtomobil magistralını – paytaxt Təl-Əviv yaxınlığındakı Ayalon yolunu bağlayıblar.
AZƏRTAC “The Times of Israel” qəzetinə istinadla xəbər verir ki, etirazçılar HƏMAS hərəkatının əlindəki 130 girovun dərhal azad olunmasını tələb edirlər.
Son aylarda Qəzza sektorunda saxlanılan girovların yaxınları və Təl-Əvivin siyasətinə qarşı çıxan vətəndaşlar dəfələrlə etiraz aksiyaları keçirərək İsrailin müxtəlif bölgələrində yolları bağlayıblar.
Xatırladaq ki, oktyabrın 7-də HƏMAS qruplaşması İsrailin nəzarətində olan ərazilərə hücum edib. Buna cavab olaraq İsrail ordusu Qəzzada hərbi əməliyyatlara başlayıb. Noyabrın 24-də Misir və Qətərin vasitəçiliyi ilə HƏMAS və İsrail arasında humanitar atəşkəs əldə olunub və hər iki tərəfdən yüzlərlə girov azad edilib. Dekabrın 1-də Qəzzada hərbi əməliyyatlar yenidən bərpa olunub.
Xeyli müddətdir ki, atəşkəs və girovların mübadiləsi ilə bağlı aparılan danışıqlar hələlik heç bir nəticə verməyib.
Bölmənin digər xəbərləri
