“Euronews” kanalında Azərbaycanda rəqəmsal təhsil barədə süjet yayımlanıb
Bakı, 27 iyul, AZƏRTAC
“Euronews” xəbər kanalı Azərbaycanda rəqəmsal təhsilə həsr olunmuş videoçarx hazırlayıb.
AZƏRTAC xəbər verir ki, “Euronews”un müxbiri ilə söhbətdə “Code Academy”nin kibertəhlükəsizlik proqram meneceri Nəriman Əliyev Azərbaycanda rəqəmsal savadlılığın və kibertəhlükəsizliyin gələcəyinin formalaşmasında bu qurumun mühüm rolu haqqında dərindən fikirləşir. “Code Academy” bu günə qədər informasiya texnologiyaları, proqramlaşdırma, rəqəmsal marketinq, dizayn və kibertəhlükəsizlik də daxil olmaqla müxtəlif fənlər üzrə 10 minə yaxın gəncə təlim keçib.
Nəriman Əliyev müasir rəqəmsal əsrdə təkcə texniki sahələrdə uğur əldə etmək üçün deyil, həm də internetdəki real məlumatı saxta informasiyadan ayırmağı öyrənmək üçün rəqəmsal savadlılığın əsas bacarıq kimi əhəmiyyətini vurğulayır. Onun sözlərinə görə, insan amili çox vaxt kibertəhlükəsizliyin ən zəif həlqəsi olur. O, bir təşkilata 2 milyard dollardan çox ziyan vuran ciddi ehtiyatsızlıq barədə də danışıb.
Nəriman Əliyev üçün müəllimlik uşaqlıqdan həvəs və arzudur, deyə “Euronews” qeyd edir. O, əmindir ki, dünyanın getdikcə informasiya texnologiyaları dövrünə qərq olduğu və dördüncü sənaye inqilabını yaşadığı bu dövrdə “Code Academy”də yetişdirilən istedadlar Azərbaycanı texnoloji cəhətdən inkişaf etmiş və təhlükəsiz gələcəyə aparacaq.
Bölmənin digər xəbərləri
