FAİQ HƏSƏNOV: Z.AZMAYPARAŞVİLİNİN YIĞMA KOMANDAYA KAPİTAN TƏYİN OLUNMASI AZƏRBAYCAN ŞAHMATÇILARININ UĞURLARINI ARTIRACAQDIR
Bakı, 19 sentyabr (AZƏRTAC). Şahmat Federasiyasının vitse-prezidenti, beynəlxalq dərəcəli hakim Faiq Həsənov sentyabrın 21-də Novxanıda keçiriləcək “Baku Open-2009” beynəlxalq şahmat turniri ilə bağlı müsahibəsində təşkilati məsələlərə də toxunaraq bildirmişdir ki, reytinqindən və digər amillərdən asılı olmayaraq, bütün iştirakçılar üçün bərabər şərait yaradılacaqdır.
F.Həsənov demişdir ki, bölgələrdə yaşayan, yığma komandanın üzvü olan şahmatçılarımızdan əlavə mehmanxanada digər yerli şahmatçılar üçün daha 30 yer ayrılacaqdır. Bundan əlavə, həmyerlilərimiz arasında ən yüksək nəticə göstərən idmançıya 3000, 2-ci yerə 2 min 500, 3-cü yerin sahibinə isə 2000 manat mükafat veriləcəkdir.
FİDE-nin vitse -prezidenti Zurab Azmayparaşvilinin Azərbaycanın yığma komandasına kapitan təyin olunmasına münasibətini açıqlayan Şahmat Federasiyasının rəsmisinin fikrincə, bu, amil komandamızın uğurlarının artırılmasında müsbət rol oynayacaqdır. Z.Azmayparaşvilinin güclü şahmatçı, eyni zamanda gözəl təşkilatçılıq qabiliyyətinə malik olduğunu diqqətə çatdıran F.Həsənov demişdir ki, o, hazırlıq prosesində komandanın hər bir üzvü ilə işləyərək, Azərbaycan şahmatçılarının beynəlxalq yarışlarda daha yüksək nəticələr qazanacağına yaxından kömək edəcəyini bildirmişdir.
Xatırladaq ki, turnirin ümumi mükafat fondu 60 min ABŞ dollarıdır.
Bölmənin digər xəbərləri
