Fərid Hüseynov: Builki Vüqar Həşimov memorialı da yüksək səviyyədə keçiriləcək
Bakı, 3 aprel, AZƏRTAC
Azərbaycanın tanınmış qrossmeysteri, Avropa çempionu mərhum Vüqar Həşimovun xatirəsinə həsr olunan şahmat üzrə beynəlxalq superturniri bu il ardıcıl dördüncü dəfə keçiriləcək. “Synergy Group”un və Azərbaycan Şahmat Federasiyasının dəstəyi ilə baş tutacaq memorialda bu dəfə də FIDE reytinqində yüksək yerlərdə qərarlaşan 10 qrossmeyster mübarizə aparacaq.
“Shamkir Chess 2017” turnirinin mətbuat xidmətindən AZƏRTAC-a bildiriblər ki, yarışın Təşkilat Komitəsi artıq iştirakçıların siyahısını dəqiqləşdirib. Superturnirdə azərbaycanlı qrossmeysterlər Şəhriyar Məmmədyarov, Teymur Rəcəbov ilə yanaşı, Uesli So (ABŞ), sabiq dünya çempionu Vladimir Kramnik (Rusiya), Sergey Karyakin (Rusiya), Maykl Adams (İngiltərə), Pentala Harikrişna (Hindistan), Pavel Elyanov (Ukrayna), Radoslav Voytaşek (Polşa) və bolqarıstanlı dünya çempionu Veselin Topalov iştirak edəcəklər.
XXI kateqoriyalı super turnirin reytinq üzrə favoriti ABŞ təmsilçisi Uesli So olacaq. Qrossmeyster hazırda Beynəlxalq Şahmat Federasiyasının reytinq cədvəlində 2822 xalla ikinci pillədə qərarlaşıb.
Vüqar Həşimov memorialının direktoru, “Shamkir Chess 2017” turnirinin Təşkilat Komitəsinin sədri Fərid Hüseynov yarışın yüksək səviyyədə keçiriləcəyinə əminliyini bildirərək deyib: “Vüqar Həşimovun xatirəsinə həsr olunmuş “Shamkir Chess” turnirinin keçirilməsi artıq ənənəyə çevrilib. Məşhur şahmatçıların iştirak etdikləri super turnir dördüncü dəfədir Şəmkirdə təşkil olunacaq. Yarışın məqsədi Vüqar Həşimovun xatirəsini yad etmək, eyni zamanda, Azərbaycanda şahmatın inkişafına dəstək olmaqdır. Şəmkirdə qələbə uğrunda ən güclü qrossmeysterlər mübarizə aparacaqlar. İnanırıq ki, şahmat həvəskarlarını bu dəfə də bir-birindən maraqlı partiyalar və gərgin idman mübarizəsi gözləyir. “Synergy Group” özünün korporativ sosial məsuliyyət prinsipinə sadiq qalaraq, turnirin keçirilməsinə böyük diqqət və qayğı göstərir.
Hər il məşhur şahmatçılarla Şəmkirə toplaşmağımız artıq ənənə halını alıb. Demək olar ki, Şəmkir artıq dünya şahmat şəhərləri siyahısına daxil olmağı bacarıb. Əcnəbi şahmatçılar əvvəlki yarışlarda təşkilatçılığı həmişə yüksək qiymətləndirir, Vüqar Həşimov memorialının böyük tarixə malik Linares və Veyk-An-Zee kimi yarışlarla müqayisə edirlər. “Shamkir Chess 2017” turnirinin də yüksək səviyyədə keçiriləcəyinə inanırıq”.
Xatırladaq ki, 2014-cü və 2015-ci illərdə turnirin qalibi ardıcıl dünya çempionu Maqnus Karlsen (Norveç) olub. Ötənilki turnirdə isə azərbaycanlı şahmatçı Şəhriyar Məmmədyarov birinci yeri tutub.
Builki turnirin təntənəli açılış mərasimi aprelin 20-də Şəmkirdəki Heydər Əliyev Mərkəzində keçiriləcək. Doqquz turdan ibarət yarışa aprelin 30-da yekun vurulacaq.
Bölmənin digər xəbərləri
