Frank Şvabe - erməni lobbisinin maraqlarına xidmət ŞƏRH
Bakı, 13 sentyabr, AZƏRTAC
Frank Şvabe və onun kimiləri erməni diasporunun təsiri altında fəal şəkildə anti-Azərbaycan kampaniyasına qoşulublar. Ölkə ictimaiyyəti Azərbaycan əleyhinə aksiya aparan ABŞ Senatının Xarici əlaqələr komitəsinin sədri Ben Kardini, Cozef Boreli, Luis Moreno Okamponu, eləcə də bir sıra ABŞ konqresmenlərini və senatorlarını, fransalı siyasətçiləri yaxşı tanıyır. Həmin adamların Azərbaycana qarşı münasibəti aydındır. Maraqlıdır ki, bu insanlar ölkəmizin mötəbər tədbirlərə ev sahibliyi etdiyi, Azərbaycanın uğurlu siyasət həyata keçirdiyi dönəmlərdə təzyiqlərini daha da gücləndirirlər. Biz bunun dəfələrlə şahidi olmuşuq.
Bunu AZƏRTAC-a açıqlamasında Siyasi və Hüquqi Araşdırmalar Mərkəzinin (SHAM) sədri, politoloq Xəyal Bəşirov deyib.
Politoloq xatırladıb ki, “Avroviziya” mahnı müsabiqəsi, Avropa Oyunları, İslam Həmrəyliyi Oyunları, Formula 1 yarışları ərəfəsində eyni proseslər müşahidə edilib.
Azərbaycanın COP29 kimi mötəbər tədbiri keçirməyə hazırlaşdığı bir məqamda bu təzyiqlərin artmasının gözlənilən olduğunu bildirən X.Bəşirov qeyd edib: “Vətən müharibəsində ərazi bütövlüyümüzün təmin edilməsi ilə nəticələnən Zəfərimizdən sonra da ölkəmiz belə təzyiqlərlə qarşılaşırdı. Hər hansı şəxsin məhbus olması ilə bağlı məsələni gündəmə gətirərək dövlətimizə qarşı təzyiq kimi istifadə edilməsi Qərbin qızışdırdığı qüvvələrin çirkin niyyətindən xəbər verir. Şvabe kimiləri “insan haqları”, “demokratiya”, “siyasi məhbuslar” kimi qulağa xoş gələn ifadələrdən siyasi dəyənək kimi istifadə edirlər. Amma unudurlar ki, müstəqil siyasət yürüdən Azərbaycan ilə təzyiq dilində danışmaq heç bir nəticə verməyəcək”.
Politoloq bildirib ki, Azərbaycana qarşı qərəzli mövqe sərgiləyən Şvabe kimiləri heç bir araşdırma aparmadan fikir yürüdürlər, mühakimə edirlər. Saxlanılan şəxsin siyasi məhbus adlandırılması istintaq və məhkəmənin qərarından sonra bəlli olur.
İspaniyanın Kataloniya bölgəsindəki milli azlığın nümayəndəsi Karles Puçdemonla bağlı danışan X.Bəşirov deyib: “Həmin adamın yenidən Kataloniyanın başçısı olmasını istəmədilər və ölkədən didərgin saldılar. İndi həmin adam sığınacaq aldığı ölkədə gizlənir. Puçdemonun zərərsizləşdirilməsi üçün nəinki İspaniya, bütün Avropa dövlətləri səfərbər olublar. Qərb ölkələri Kataloniyanın azadlıq mübarizəsinin qarşısının alınması üçün əlindən gələni etdi. Həmin adam da siyasi məhbusdur. Niyə onun da taleyi Şvabeni narahat etmir?”.
Politoloq bildirib ki, Şvabe illərlə erməni lobbisinin təsiri altında olmaqla, Qarabağ ermənilərinin hüquqları barədə danışıb. Lakin o, Qarabağda qondarma rejim və işğalçı Ermənistan tərəfindən törədilmiş dağıntılar və Azərbaycanın mədəni irsinin dağıdılması, azərbaycanlıların oraya qayıdış hüquqlarının tapdalanması barədə 30 il ərzində bir söz belə deməyib. Bu fakt Şvabenin nə dərəcədə qərəzli və erməni lobbisinin maraqlarına xidmət edən şəxs olmasını göstərir.
Şvabenin Almaniyanın ictimai kanalı ARD-də Azərbaycan əleyhinə bədii filmin hazırlanmasında yaxından iştirakını xatırladan X.Bəşirov bunun heç də təsadüfi olmadığını deyib: “Vətən müharibəsi dövründə həmin kanalın müxbiri Azərbaycan Prezidentinə Qarabağın və Azərbaycanın digər ərazilərinin ancaq təbii sərvətlərinə görə önəm kəsb etməsi ilə bağlı cəfəng sual vermişdi. Prezident İlham Əliyev isə cavabında bildirmişdi: “Elzas və Lataringe sizin üçün önəmlidir? Bavariya sizin üçün önəmlidir? Yaxud Reyn-Vestfaliya? Bu, bizim torpaqdır, beynəlxalq səviyyədə tanınan bizim ərazimizdir. Bu, resurslar məsələsi deyil. Əsas resurslar burada, Bakıdadır. Bu, ədalət məsələsidir, bu, milli qürur məsələsidir və bu, beynəlxalq hüquq məsələsidir”.
Elzas və Lataringe Almaniyanın torpaqlarıdır və İkinci Dünya müharibəsində həmin torpaqları Fransa uduzub. Bu məqamları nəzərə alaraq onu demək lazımdır ki, bu qüvvələrin Azərbaycana qarşı səfərbər olmasının əsas səbəbi məhz Azərbaycanın uğurlarını gözləri götürməməsidir. Şvabenin siyasətinin səbəbi zamanında Rusiya şirkətləri ilə yaxın əlaqələrin olması və adının korrupsiyada hallanmasıdır. Demək ki, bu adam maraqlarına uyğun siyasət yürüdür”.
Politoloq bildirib ki, F.Şvabe cari ilin yanvarında Avropa Şurası Parlament Assambleyasında Azərbaycan nümayəndə heyətinin etimadnaməsinin təsdiqlənməməsinə dair çağırış edənlərdəndir və bu da onun hansı məzhəbə xidmət etdiyini göstərir.
Bölmənin digər xəbərləri
