Bakı, 13 sentyabr, AZƏRTAC

Azərbaycanda beynəlxalq əhəmiyyətli iqtisadi-mədəni tədbirlərin keçirilməsi ərəfəsində Qərbdəki müəyyən dairələrin ölkəmizə qarşı hərəkətə keçməsi tendensiya xarakteri alıb. Biz “Eurovision” mahnı müsabiqəsi, Avropa Oyunları, İslam Oyunları, Formula-1 yarışları dönəmində bunun artıq şahidi olmuşuq. Bizə qarşı istifadə olunan silahlar, mövzular dəyişməz olaraq qalır. “İnsan haqları”, “demokratiya”, “siyasi məhbus” ifadələri bu dəfə də gündəmdədir. 2020-ci ildə 44 günlük Vətən müharibəsindən sonra məlum dairələrin əlinə yeni “fürsət”, “mövzu” düşdü. Qarabağda yaşamış ermənilərin guya hüquqları pozulub, Azərbaycan onlara qarşı qeyri-mütənasib güc tətbiq edib. Bu məsələdə ən çox canfəşanlıq edən tərəf isə Avropa Şurası Parlament Assambleyasında (AŞPA) Azərbaycan əleyhinə aparılan kampaniyanın müəllifi, ölkəmizin qurumdakı nümayəndə heyətinin fəaliyyətinin dayanmasının baiskarı almaniyalı deputat Frank Şvabedir.

Bu sözləri AZƏRTAC-a açıqlamasında politoloq Ramiz Alıyev bildirib.

Politoloq deyib: “Prezident İlham Əliyev İtaliyaya işgüzar səfəri zamanı çıxışında bildirdi ki, AŞPA-da 70-dək deputat Azərbaycan əleyhinə mövqe sərgiləyib. Onların içərisində ən fəalı Frank Şvabe olub. Dövlətimizin başçısının qeyd etdiyi kimi, AŞPA Azərbaycana münasibətdə davranışını dəyişərsə, bədnam qətnamə ləğv olunarsa, rəsmi Bakı AŞPA ilə münasibətlərə yenidən baxa bilər.

Ermənistan və onun havadarları Azərbaycanın 200 illik separatizmə, terrorizmə son qoymasını, ərazi bütövlüyünün bərpasını qəbul edə bilmirlər. Azərbaycanın Cənubi Qafqazda söz sahibi ölkəyə çevrilməsi şvabekimiləri ciddi narahat edir. Türklərə nifrəti, ermənilərə qarşı simpatiyası ilə diqqət çəkən almaniyalı deputat qərəzli mövqeyindən dönmək fikrində deyil. 2019-cu ildə Almaniya parlamentində çıxışı zamanı Azərbaycanı müdafiə etmiş deputat həmkarı Karin Strenzi korrupsiyada ittiham edən F.Şvabenin özünün maliyyə gəlirləri ciddi şübhə doğurur. O, 2016-cı ilin Aprel döyüşləri zamanı Avropa Parlamentində çıxış edərək keçmiş separatçı rejimin müstəqilliyinin tanınmasını istəmişdi. BMT-nin, Avropa Şurasının prinsiplərinə hörmətsizlik edən Frank Şvabe beynəlxalq təşkilatların qətnamələrində təsdiqini tapmış işğal faktını nəinki inkar edir, hətta ona haqq qazandırır. O, yenidən Azərbaycanda “siyasi məhbusların” olması faktını qaldırıb və onlara azadlıq tələb edib.

Qarabağda Ermənistan tərəfindən törədilmiş cinayətlər, Azərbaycanın mədəni irsinin dağıdılması, azərbaycanlıların oradan zorla köçürülməsi mövzularında 30 il ərzində bir kəlmə belə danışmayan F.Şvabe mütəmadi olaraq Qarabağı könüllü şəkildə tərk etmiş ermənilərin müdafiəsinə qalxıb, siyasi məhbus mövzusu ilə üzərimizə hücuma keçib. F.Şvabe, Luis Okampo, bəzi ABŞ konqresmenləri və senatorları, fransalı siyasətçilər və insan hüquqları müdafiəçilərinin məqsədyönlü və sifarişlə üzərimizə hücum etmələri əslində Qərbin riyakar, ikili siyasətinin bariz nümunəsidir. COP29 kimi mötəbər konfrans ərəfəsində ölkəmizə qarşı çirkin oyunlarını daha da gücləndirən qərbli siyasilər Azərbaycanı qaralamaq üçün erməni lobbisindən və anti-Azərbaycan qüvvələrdən aldıqları sifarişləri can-başla icra edirlər. Onlar “siyasi məhbus“ kimi kiflənmiş mövzuları yenidən gündəmə gətirməklə şantaj və qarayaxma kampaniyasını davam etdirirlər”.

Azərbaycanın həm hərbi, həm də diplomatik müstəvilərdə vacib nəticələr qazanmasının bədnam qüvvələrin planlarını alt-üst etdiyini vurğulayan R.Alıyev Frank Şvabe kimi sifariş icraçılarının fəallaşmasının təsadüfi olmadığını deyərək əlavə edib: “Onun təmsil olunduğu partiya nümayəndələrinin adları daim casusluqda, korrupsiyada, sifarişli çıxışlarda hallanıb. Almaniya-Fransa tandeminin ruporu kimi çıxış edən F.Şvabenin ölkəmizə qarşı çirkin kampaniyası bumeranq effekti verəcək. Azərbaycanın artan nüfuzu, iqtisadi gücü, siyasi-diplomatik məharəti ona qarşı aparılan çirkin kampaniyaları dəf etməyə imkan verir. Odur ki, Frank Şvabe və onun dostlarının qərəzli, sifarişli çıxışları Azərbaycanın nüfuzunu zədələmək iqtidarında deyil”.