DÜNYA
Fransa parlamenti növbəti dəfə buraxılacaqmı?
Bakı, 8 avqust, AZƏRTAC
Fransanın gündəlik “Le Figaro” qəzeti cümə axşamı belə bir qənaətə gəlib ki, "Olimpiya barışığı" adlandırılan siyasi fasilə Fransada hökumət və parlament çoxluğunun olmaması ilə bağlı vəziyyəti həll etmək əvəzinə, çox güman ki, dondurub.
AZƏRTAC xəbər verir ki, qəzetin məlumatına görə, bir çox siyasətçilər növbəti dəfə parlamentin buraxılmasını gözləyirlər.
“Hər bir varianta, xüsusilə Milli Assambleyanın növbəti dəfə buraxılmasına hazır olmaq lazımdır”, - deyə sağ mərkəzçi partiyasından olan siyasətçi Fransua Qular qəzetə bildirib.
“Le Figaro” ən azı avqustun ortasına qədər davam edəcək “barışığ”ın sona çatmasından sonra 1 il davam edə biləcək bir hökumətin meydana formalaşdırılacağı ilə bağlı sual verir. Quların sözlərinə görə, bu, çox şübhəlidir, çünki bu gün parlamentdə çoxluğa malik olmaq qeyri-mümkündür.
“Bu ilin iyun-iyul aylarında keçirilən seçkilərdə seçilən Milli Assambleyada hər kəs artıq 2025-ci ildə keçiriləcək parlament seçkilərindən danışır”, - deyə ifrat solçu “France Untamed” partiyasından olan siyasətçi Antuan Leman “Le Figaro”ya bildirib. Onun sözlərinə görə, bu, səlahiyyət müddətinin qısa olacağı fikrini təsdiqləyir. Sosialist Partiyasından olan deputat Fabris Barüsu da yeni mandatın həyəcanverici başlanğıcı haqqında bəhs edib.
“Le Figaro”ya görə, Prezident Emmanuel Makron bir ildən sonra (yəni 2025-ci ilin iyun ayında) parlamentin təkrar buraxılma ehtimalını tamamilə istisna etməyib. Qəzet onun Oyunlar ərəfəsində televiziyaya verdiyi müsahibədə dediyi sözləri məhz belə şərh edib. Makron “Le Figaro”nun “nüvə institusional düyməsi” adlandırdığı funksiyadan yenidən istifadə etmək istəmədiyini bildirib. Lakin, şərt ondan ibarətdir ki, yeni çoxluq yarada biləcək siyasi qüvvələr sabitlik istəyəcək”, -deyə Makron vurğulayıb.
Qəzet qeyd edir ki, bu, o deməkdir ki, dövlət başçısı Makronun “respublikaçı” adlandırdığı siyasi partiyaların düşərgəsində qarşıdakı aylarda kompromis əldə olunmazsa, o, istənilən seçimi özündə saxlayır.
“Le Figaro” qəzeti sonda yazır ki, bir çox siyasətçilər ölkəni xroniki qeyri-sabitliyə aparacaq yeni seçkilər ərəfəsində qorxularını ifadə edirlər.
