Bakı, 6 yanvar, AZƏRTAC

Hazırda Azərbaycanda hotelçilik sahəsində, xüsusilə də xidmət sferasında müəyyən çatışmazlıqlar var. Məlumdur ki, dövlət səviyyəsində hotelçiliyin inkişafına xüsusi diqqət ayrılır. Məhz ölkədə aparılan məqsədyönlü siyasət nəticəsində yeni hotellərin açılması stimullaşdırılır, mühüm sosial-iqtisadi infrastruktur layihələrinin icrası uğurla davam etdirilir. Ancaq turizmin inkişafını yalnız infrastrukturlarla bağlamaq olmaz. Turizm kompleks bir sahə olduğundan, bu sahənin inkişafı üçün də kompleks yanaşma mütləqdir. Başqa sözlə, infrastrukturla təklif edilən xidmətlər üst-üstə düşməlidir. Xidmət səviyyəsinin keyfiyyəti hotellərin ulduz dərəcələri ilə birbaşa əlaqəlidir. Pandemiya dövründə hotelçilik də ağır bir sınaqdan keçdi.

AZƏRTAC xəbər verir ki, bu fikirlər Azərbaycan Dövlət Turizm Agentliyinin sədri Fuad Nağıyevin “Milli Məclis” analitik informasiya jurnalına verdiyi müsahibədə yer alıb.

Agentlik rəhbərinin sözlərinə görə, hotellərdə xidmətin səviyyəsinin yüksəldilməsi istiqamətində kifayət qədər irəliləyiş və inkişaf da müşahidə olunur. Ulduz dərəcələrinin hotellərin real olaraq təklif etdikləri xidmətlərə uyğunlaşdırılması məqsədilə müəyyən təşəbbüslər həyata keçirilib.

“Burada hotelçilik sahəsində fəaliyyət göstərən ictimai birlik və assosiasiyaların da xidmətləri böyükdür. Azərbaycan Akkreditasiya Mərkəzi Azərbaycan Turizm Bürosuna uyğunluğun qiymətləndirilməsi üzrə akkreditasiya attestatı verdikdən sonra Büro Azərbaycan Hotel Assosiasiyası ilə birlikdə Milli Ulduz Təsnifatını işləyib hazırladı. Beləliklə, beynəlxalq standartlar və meyarlar əsas götürülərək, eləcə də yerli şərait nəzərə alınaraq hazırlanan milli ulduz sistemi əsasında hotellərin ilkin qiymətləndirilməsi aparıldı. Artıq ölkədə fəaliyyətdə olan 17 hotel bu sistemə uyğun qiymətləndirilərək ulduz dərəcəsini əldə edib. Bu prosesdə əsas məqam şəffaflığın təmin edilməsi idi. Ulduzlaşma prosesinin uzun çəkməsinin əsas səbəblərindən biri də bununla bağlı idi. Məqsəd ölkənin turizm imicinin qorunması olduğu üçün bu sahədə dürüst yanaşma mütləqdir. Təəssüflə qeyd etməliyəm ki, ilkin qiymətləndirmələrə əsasən, bir sıra hotellər hazırda malik olduqları şərait və təklif etdikləri xidmətlərin sayı və keyfiyyətinə görə iddia etdikləri ulduz dərəcəsini ala bilmədilər. Bunu nəzərə alaraq, Dövlət Turizm Agentliyi Azərbaycan Turizm Bürosu və Azərbaycan Hotel Assosiasiyasının iştirakı ilə hotellərə konsultativ dəstəyin göstərilməsini təmin edəcək”, - deyə Fuad Nağıyev söyləyib.