Gədəbəy rayonuna infotur təşkil edilmişdir
Bakı, 10 sentyabr (AZƏRTAC). Azərbaycan Prezidentinin 2011-ci ilin “Turizm ili” elan etməsi ilə bağlı tədbirlər planına uyğun olaraq regionlarda turizmin müxtəlif növlərini inkişaf etdirmək, turizm xidməti obyektlərinə yerli turizm şirkətlərinin səfərlərinin mütəmadi təşkili, daxili turizm bazarının fəallığını artırmaq məqsədilə layihələr həyata keçirilir.
AZƏRTAC xəbər verir ki, bu layihələrin davamı olaraq sentyabrın 10-da Mədəniyyət və Turizm Nazirliyinin dəstəyi, “Millenium” turizm şirkətinin və “Eldorado” mehmanxanasının təşkilatçılığı ilə Gədəbəy rayonuna infotur təşkil edilmişdir. İnfoturda Mədəniyyət və Turizm Nazirliyinin, turizm şirkətlərinin əməkdaşları və KİV nümayəndələrindən ibarət 50 nəfərlik heyət iştirak edir.
İlk olaraq iştirakçılar “Eldorado” mehmanxanası ilə yaxından tanış olmuşlar. Bildirilmişdir ki, 3 hektar ərazidə yerləşən bu hotel turistlərə və iş adamlarına yüksək səviyyəli xidmət təklif edir. Gün ərzində burada 80-ə yaxın qonağa xidmət göstərmək mümkündür. Son texnologiya əsasında qurulmuş hoteldə sauna, trenajor zalı vardır. Mehmanxanada yerli turistlərlə yanaşı, xarici turistlər də istirahət edirlər.
İnfotur çərçivəsində regionda turist xidmətinin keyfiyyətinin yaxşılaşdırılması və onun səviyyəsinin müasir standartlara çatdırılmasına dair “dəyirmi masa” keçirilmişdir.
“Millenium” turizm şirkətinin rəhbəri Ruslan Quliyev bildirmişdir ki, “Azərbaycanda yeni marşrutlar kəşf edək” devizi altında keçirilən infoturun məqsədi Gədəbəy rayonunun turizm potensialını, mövcud infrаstrukturunu, əsas turizm xidmətlərini nümayiş etdirmək, daxili turizm bazarının fəallığını artırmaq, regionda fəaliyyət göstərən istirahət komplekslərinin şirkətlərlə əməkdaşlığını təmin etməkdir.
R.Quliyev turizm imkanlarının öyrənilməsində və təbliğində, turizm şirkətləri ilə işgüzar mühitin yaradılmasında, yerli və xarici turistlərin cəlb edilməsində belə infoturların əhəmiyyətini yüksək qiymətləndirmiş və bu cür tədbirlərin mütəmadi keçiriləcəyini vurğulamışdır.
Tədbirdə Gədəbəy Rayon İcra Hakimiyyətinin başçısı Kamran Rzazadə rayon haqqında iştirkçılara ətraflı məlumat vermiş və turizmin inkişafı istqamətində görüləcək işlərdən danışmışdır. Bildirmişdir ki, Gədəbəy rayonu Azərbaycanın ən qədim yaşayış məskənlərindən biridir. Ərazidə olan qədim mədəniyyət abidələri eramizdan əvvəl XII-VII əsrləri əhatə edən Xocalı-Gədəbəy mədəniyyətinin bir hissəsi kimi tariximizə daxil olmuşdur.
XIX əsrin ortalarinda Gədəbəy rayonunda mis filizi yataqları kəşf edilmiş və 1855-1856-cı illərdə yerli sahibkarlar tərəfindən misəritmə zavodu tikilmişdir. Daha sonra həmin zavod Almaniyanin “Siemens” şirkəti tərəfindən alınaraq, 1865-ci ildə yenidən qurulmuşdur. “Siemens” şirkəti tərəfindən 1883-cü ildə Qalakənd misəritmə zavodu tikilmiş, 1879-cu ildə Zaqafqaziyada ilk dəfə, Gədəbəy-Qalakənd arasında uzunluğu 28 kilometr olan dəmir yolu çəkilmişdir. Bu gün də həmin yol ilə bağlı salınmiş körpülər tarixi abidə kimi qalmaqdadır. 1883-cü ildə Qalakənd kəndində çar Rusiyasi ərazisində ilk su elektrik stansiyası tikilmiş, Qalakənd misəritmə zavodunda elektroliz üsulu ilə mis əridilmişdir. Bu zaman Avropanın mərkəziləri - London, Paris, Sankt-Peterburq şəhərlərində kerosin lampalarından istifadə olunduğu halda, Gədəbəydə elektrik işığından istifadə edilirdi.
Həmin dövrdə alman alimləri tərəfindən rayonda arxeoloji qazıntı işləri aparılmışdır. Arxeoloji qazıntının nəticələri Almaniyanin “Folker Şpis” nəşriyyatı tərəfindən “Qalakənd” adlı elmi əsərdə Berlində çap edilmişdir. Əsər Berlin Dövlət Muzeyində saxlanılır.
Rayonda 1 dünya, 81 ölkə və 24 yerli əhəmiyyətli abidə qeydə alınmışdır. Gədəbəyin hər guşəsində qala və qalaçalar, müdafiə istehkamları, məbəd və türbələr vardır. Koroğlu qalası daha məşhurdur. Ona Cavanşir qalası da deyirlər. Bundan əlavə, Cənnət qala, Qız qalası, Zəngi qala və digərləri hərəsi ayrı-ayrılqda bir sənət əsəri, xalqın mənəvi tarixinin əvəzsiz yadigarı olmaqla bu gün də qorunmaqdadır.
Tədbirdə jurnalistlərin sualları cavablandırılmış, müzakirələr aparılmışdır.
Qeyd edək ki, infoturun növbəti günü turizm şirkətləri və KİV-lərin nümayəndələri Gədəbəy rayonunda mədəni-tarixi abidələrlə və rayonun təbiəti ilə tanış olacaqlar.
Bölmənin digər xəbərləri
