“GƏL, GÜNAHA BATAQ” KİTABININ TƏQDİMATI OLMUŞDUR
“Nurlan” nəşriyyatında buraxılmış kitaba müəllifin şeirləri, aforizmləri, iki poeması və bir nəsr əsəri daxildir.
Potsdam Dövlət Universitetinin professoru, doktor Vilfrid Furmannın “Sonuncu Amazon” adlı ön sözündə yazır: “N.Atəşi yazıçı J.Veislederin dediyi kimi, alman poeziyasında duyğuların renessansını yaradan bir şairədir. Bəli, biz onun Almaniyada varlığı ilə fəxr edirik. O, bizim üçün, bizim ölkəmiz üçün əsil tapıntıdır. Onun həyat mübarizəsi, dünyanı gözəlləşdirmək, yeniləşdirmək, cəmiyyəti aydınlatmaq istəkləri yalnız öz həmvətənlərinə deyil, həm də bütün bəşəriyyətə ünvanlanır”.
Yazıçılar Birliyinin poeziya bölməsinin rəhbəri Çingiz Əlioğlu mərasimi açaraq, təkcə təqdim edilən kitab barədə deyil, ümumən N.Atəşinin fəaliyyətindən, çoxşaxəli yaradıcılığından danışmışdır. Bildirmişdir ki, onun Berlində və Bakıda şeir, nəsr, publisistika, tərcümə sahəsində müxtəlif dillərdə 10-dan artıq kitabı çıxmışdır. Sözlərinə alman, türk, Azərbaycan bəstəkarları tərəfindən onlarca mahnı bəstələnmiş şairin şeirləri ingilis, fransız, fars və rus dillərinə tərcümə olunmuşdur. Azərbaycan, alman və türk dillərində yazıb-yaradan şairin poeziyası hər cür riyakarlıqdan uzaqdır. Bəstəkar Faiq Sücəddinovun xalq artisti İlhamə Quliyeva tərəfindən böyük sənətkarlıqla ifa edilən “Neylərsən?” mahnısının sözlərini Nuridə Atəşi hələ 17 yaşında ikən yazmışdır.
Yazıçılar Birliyinin sədri, xalq yazıçısı Anar Nuridə Atəşini istedadlı şair, cəsur insan kimi dəyərləndirməklə yanaşı, onun Almaniyada azərbaycançılıq baxımından çox əhəmiyyətli işlər gördüyünü, Qərbdə Azərbaycan mədəniyyətinin təbliği ilə ardıcıl və qətiyyətlə məşğul olduğunu bildirmişdir. O demişdir ki, gücünə, qüvvəsinə möhkəm inanan şair öz iradəsi və qazandığı nüfuz sayəsində artıq Almaniya ictimai aləminə qatılmışdır. Dünya azərbaycanlılarının II qurultayına onun təşəbbüsü ilə həmin ölkənin tanınmış nümayəndələri də gəlmişdi.
Çıxışlardan daha çox oxucuları ilə ünsiyyətdə olmaq istəyən N.Atəşi bir saatdan artıq şeir oxumuşdur.
Bölmənin digər xəbərləri
