Gənc riyaziyyatçının hədəfi IMO-da medal qazanmaqdır VİDEO
Bakı, 7 sentyabr, AZƏRTAC
Fizika, riyaziyyat və informatika təmayüllü liseyin 9-cu sinif şagirdi riyaziyyat üzrə qazandığı uğurlarla diqqət çəkir. Liseyin şagirdi Şamil Abbasov AZƏRTAC-a müsahibəsində 6-cı sinifdə Beyləqanda təhsil alarkən respublika fənn müsabiqələrinin final mərhələsinə yüksəldiyini qeyd edib.
Həmin il medal qazana bilməsə də, 7-ci sinifdə fizika, riyaziyyat və informatika təmayüllü liseyə qəbul olduqdan sonra onun uğurları davam edib. Şagird bildirir ki, liseydəki mühit və müəllimləri onun uğurlarında mühüm rol oynayıb. O, 7-ci sinifdə riyaziyyat fənnindən gümüş medal qazanıb. 8-ci sinifdə respublika fənn olimpiadasında riyaziyyat üzrə yenidən gümüş medala layiq görülüb. Şamil Abbasov, həmçinin Yeniyetmələrin Balkan Riyaziyyat Olimpiadasında bürünc medal əldə edib.
Həmsöhbətimizin əsas hədəfi isə yaxın illərdə Beynəlxalq Riyaziyyat Olimpiadasında – IMO-da medal qazanmaqdır: “Mən istəyirəm ki, 9, 10 və ya 11-ci siniflərin hər hansı birində IMO-da, yəni Beynəlxalq Riyaziyyat Olimpiadasında medal qazana bilim”. O, gələcəkdə xaricdə universitetlərdən birində təhsil almaq istədiyini söyləyib.
Şamil Abbasov əmindir ki, qazandığı medallar gələcək təhsil həyatında ona böyük imkanlar yaradacaq.
Müsahibimiz hazırlıq prosesində müasir texnologiyalardan, o cümlədən süni intellektdən də müəyyən hallarda yararlandığını deyib. Onun sözlərinə görə, xüsusilə çətin məsələlərdə süni intellektdən ipucu alır və daha sonra məsələni özü həll etməyə çalışır. Bununla belə, hesab edir ki, müəllimin izahı dərsin daha yaxşı qavranılmasında mühüm üstünlüyə malikdir. “Məncə, müəllimin izahı daha yaxşıdır. Çünki müəllim bizi daha çox başa düşə bilir, bizim necə başa düşəcəyimizi bilir. Ona görə də dərsi həmin yollarla izah edir”.
Gələcəkdə müəllim olacağı təqdirdə şagirdlərə əsas tövsiyəsinin daha çox çalışmaq olacağını bildirən Şamil Abbasov deyib: “Yalnız dərsdə müəllimin izah etdikləri ilə kifayətlənmək olmaz. Daha çox təkrar etmələrini deyərdim. Sadəcə müəllimin dedikləri ilə qalmayıb, evdə də çalışmalarını tövsiyə edərdim”.
Gənc riyaziyyatçının sözlərinə görə, uğurun əsas şərtlərindən biri davamlı çalışma, digər tərəfdən isə müəllimlərin düzgün istiqamətləndirməsidir.
Bölmənin digər xəbərləri
