“GƏNCLƏR TƏŞKİLATI NƏDİR VƏ ONU NECƏ YARATMAQ LAZIMDIR?” MÖVZUSUNDA TƏLİM KURSLARI KEÇİRİLMİŞDİR
Bakı, 24 sentyabr (AZƏRTAC). Gənclər və İdman Nazirliyi tərəfindən regionlarda “Gənclər təşkilatı nədir və onu necə yaratmaq lazımdır?” mövzusunda təlim kursları keçirilmişdir.
Nazirlikdən bildirmişlər ki, məqsəd gənclərin qeyri-hökumət gənclər təşkilatları sahəsində maariflənmə işini davam etdirmək, gənclər və idman idarələrinin əməkdaşlarını bu sahədə yeni yaranmış anlayışlarla, metodlarla tanış etmək, gənclərin asudə vaxtlarının səmərəli təşkilində yeni fəaliyyət istiqamətləri müəyyən etmək və nəticədə gənclər siyasətinin regionlarda daha da effektiv həyata keçirilməsinə nail olmaqdır.
Qeyd edək ki, artıq Aran və Quba-Xaçmaz, Lənkəran-Astara, Şirvan zonalarına daxil olan rayonların gənclər və idman idarələrinin əməkdaşları və ictimai fəal gəncləri üçün təlimlər keçirilmişdir.
Kurslar bu sahə üzrə ixtisaslaşmış təlimçilər tərəfindən aparılmışdır.
Ümumilikdə təlim kurslarında 18 rayondan 200-ə yaxın gənc iştirak etmişdir.
Kurslarda region gənclərinin inkişafında özünəməxsus rolu olan gənclər təşkilatları haqqında, təşkilatın yaradılması, idarə olunması, könüllülərin cəlb olunması, layihələrin hazırlanması və icrası mövzuları üzrə, o cümlədən Qeyri-Hökumət Təşkilatları (İctimai birliklər və fondlar) haqqında Azərbaycan Respublikası qanununun müddəaları və gənclər təşkilatlarının fəaliyyətini tənzimləyən digər normativ-hüquqi sənədlər barədə gənclərə ətraflı məlumatlar verilmişdir.
Bölmənin digər xəbərləri
