GÖRKƏMLİ ŞƏRQŞÜNAS-ALİM AİDA İMANQULİYEVANIN XATİRƏSİNƏ HƏSR OLUNMUŞ TƏDBİR KEÇİRİLMİŞDİR
Mərasimdə Ailə, Qadın və Uşaq Problemləri üzrə Dövlət Komitəsinin sədri Hicran Hüseynova, Azərbaycan Milli Elmlər Akademiyası (AMEA) Şərqşünaslıq İnstitutunun direktoru, filologiya elmləri doktoru Gövhər Baxşəliyeva, Nəsimi adına Dilçilik İnstitutunun direktoru, AMEA-nın müxbir üzvü Ağamusa Axundov, AMEA-nın müxbir üzvü Vasim Məmmədəliyev, filologiya elmləri doktoru Vilayət Cəfərov, respublikanın baş psixiatrı Ağabəy Sultanov və başqaları Aida İmanquliyevanın həyat və elmi fəaliyyətindən danışmış, bu gözəl insanla bağlı xatirələrini diqqətə çatdırmışlar. Bildirilmişdir ki, heç kimə, heç nəyə məhəl qoymadan, su kimi axıb-gedən vaxtın, zamanın içində Aida xanımın da öz vaxtı var idi. Bu kəşməkəşli dünyada o cəmi 53 il yaşamasına baxmayaraq, qədrini bildiyi və hər anından bəhrələndiyi vaxtın yaddaşında əbədi yer almış, böyük yadigarlar qoyub getmişdir.
Bakı Dövlət Universiteti şərqşünaslıq fakültəsi ərəbşünaslıq qrupunun ilk tələbələrindən biri olmuş Aida xanım Moskvada Şərqşünaslıq İnstitutunda ərəb filologiyası üzrə aspiranturada təhsil alaraq, “Qələmlər cəmiyyəti” və Mixail Nüaymənin yaradıcılığında onun rolu” mövzusunda namizədlik dissertasiyasını müdafiə etdikdən sonra, ardıcıl, davamlı çalışmaları onu respublikamızın şərqşünaslıq məktəbinin görkəmli nümayəndələrindən birinə çevirmişdir.
Natiqlər Aida İmanquliyevanın keçmiş SSRİ-də yeni ərəb ədəbiyyatı kursunun əsas yaradıcılarından biri olduğunu, ərəb ədəbiyyatının ən ciddi tədqiqatçısı kimi tanındığını diqqətə çatdırmışlar. Qeyd edilmişdir ki, həyatını Azərbaycan elminin inkişafına həsr etmiş görkəmli ictimai xadim, qısa ömrünün sonlarında təşkilatçılıq qabiliyyətini də göstərmiş, Şərqşünaslıq İnstitutunun direktoru işlədiyi dövrdə bu elm ocağının daha da təkmilləşdirilməsinə öz töhfəsini vermişdir.
Görkəmli şərqşünas-alim, ərəb mühacir ədəbiyyatının tədqiqatçısı, əsil vətəndaş, gözəl insan, fədakar ana olmuş Aida xanım İmanquliyevanın xatirəsinin əbədiləşdirilməsinin vacibliyini vurğulayan natiqlər bildirmişlər ki, elmdə qazandığı nüfuzu, dəyərini itirməyən elmi irsi, yaddaşlarda qalan xatirələri, vətəndaşlıq mövqeyi ilə seçilən övladları onu zamanın pozulmaz səhifələrində artıq əbədiləşdirmişlər.
Aida xanım İmanquliyevanın qızı, filologiya elmləri doktoru, professor Nərgiz Paşayeva anasının xatirəsinə həsr olunmuş, olduqca səmimi keçmiş tədbirin təşkilatçılarına və iştirakçılara minnətdarlığını bildirmişdir.
Mərasimdə Azərbaycan Prezidenti katibliyinin rəisi Dilarə Seyidzadə və Azərbaycan Respublikasının Prezidenti yanında Ali Attestasiya Komissiyasının sədri akademik Arif Mehdiyev iştirak etmişlər.
Bölmənin digər xəbərləri
