Göyçayda keçirilən "Təmiz hava" aylığı uğurla davam edir
Göyçay, 10 avqust (AZƏRTAC). Ekologiya və Təbii Sərvətlər Nazirliyinin 6 saylı Göyçay ərazi şöbəsi rayon dövlət yol polisi bölməsi ilə birgə avqustun 1-dən başlayaraq "Təmiz hava" aylığı keçirir.
AZƏRTAC xəbər verir ki, atmosferə nəqliyyat vasitələri tərəfindən normadan artıq zəhərli qazların buraxılmasının qarşısının alınması üçün hər gün rayonun müxtəlif yerlərində reydlər təşkil edilir. Mütəxəssislər nəqliyyat vasitələrinin bir çoxunun atmosferə normadan artıq zəhərli qazlar buraxması faktını üzə çıxarmışlar. Müəyyən edilmişdir ki, atmosferə normadan artıq zəhərli qazları ən çox keçmiş sovet istehsalı olan "VAZ", “QAZ”, “KamAZ”, “İkarus”, ”Zil” markalı avtomobillərdən atılır. Həmin avtomobillərin böyük əksəriyyətinin istismar müddəti başa çatmışdır. Yəni, texniki cəhətdən nasaz olan bu avtomobillərdən atmosferə daha çox zəhərli qazlar atılır.
Reydlər zamanı atmosferə normadan artıq zəhərli qazlar atan 38 avtomobilin sürücüsü intizama dəvət olunmuşdur. Aşkarlanmış faktla bağlı protokol tərtib edilmiş və avtomobil sahibləri cərimə edilmişlər.
Göyçay ekologiya və təbii sərvətlər şöbəsinin əməkdaşları “Təmiz hava” aylığı çərçivəsində sürücülərİ, fərdi vətəndaşları, fiziki və hüquqi şəxsləri maarifləndirir, istehsal müəssisələri və təşkilatlarda ekoloji təbliğat işləri aparırlar. Keçirilən tədbirlər zamanı vətəndaşlara izah edilir ki, atmosferin çirkləndirilməsinin qarşısını almaq təkcə yol polisinin və ekoloqların işi deyil, bu, həm də ictimaiyyətin əsas vəzifəsidir. “Təmiz hava” aylığı çərçivəsində maarifləndirmə tədbirləri avqustun 31-dək davam edəcək.
Bölmənin digər xəbərləri
