Bakı, 27 sentyabr, AZƏRTAC

Göyçay şəhər Şəhidlər xiyabanında şəhidlərimizin Anım Gününə həsr olunmuş tədbir keçirilib.

AZƏRTAC xəbər verir ki, əvvəlcə şəhidlərimizin məzarları üzərinə gül dəstələri düzülüb, xatirələri yad edilib. Azərbaycan Respublikasının Dövlət Himni səsləndirilib.

Tədbirdə Göyçay Rayon İcra Hakimiyyətinin başçısı Natiq Ağayev, Milli Məclisin deputatı Məzahir Əfəndiyev, hüquq-mühafizə orqanlarının, rayonda fəaliyyət göstərən idarə, müəssisə və təşkilatların rəhbərləri, YAP rayon təşkilatının sədri, şəhid ailələrinin üzvləri, qazilər, müharibə veteranları və rayon ictimaiyyətinin nümayəndələri iştirak ediblər.

Göyçay Rayon İcra Hakimiyyətinin başçısı bildirib ki, bu gün bütün Azərbaycan xalqı və dünya azərbaycanlıları müqəddəs Vətənimiz uğrunda canlarından keçən şəhidlərimizin xatirəsini dərin ehtiramla anır. 27 sentyabr doğma torpaqlarımızı işğaldan azad etmək yolunda hərbi siyasi gücümüzün ortaya qətiyyətlə qoyulduğu, milli ruhumuzun, milli həmrəyliyimizin nümayiş etdirildiyi bir gündür. Prezident İlham Əliyevin 2020-ci il 2 dekabr tarixli Sərəncamına əsasən təsis edilən Anım Günü Vətən müharibəsində qəhrəmancasına döyüşmüş, ölkəmizin ərazi bütövlüyü yolunda canlarından keçmiş əsgər və zabitlərimizə, bütün şəhidlərimizə dərin ehtiramın ifadəsidir.

Sonra Milli Məclisin deputatı Məzahir Əfəndiyev çıxış edərək, Ümummilli Lider Heydər Əliyevin müstəsna xidmətləri sayəsində formalaşan və inkişaf yoluna qədəm qoyan Azərbaycan Silahlı Qüvvələrinin bu gün Müzəffər Ali Baş Komandan İlham Əliyevin rəhbərliyi ilə öz şərəfli missiyasını uğurla davam etdirdiyini bildirib.

Rayon ziyalıları adından qabaqcıl tarix müəllimi Firəngiz Məmmədyarova, şəhid ailələri adından şəhid Orxan Kərimlinin atası Akif Kərimov, döyüş bölgəsində xidmət göstərmiş rayon Mərkəzi Xəstəxanasının Reanimasiya şöbəsinin müdiri Emil Əliyev, 44 günlük Vətən müharibəsinin iştirakçısı Ayaz Babayev çıxışlarında Prezident İlham Əliyevin rəhbərliyi ilə həyata keçirilən 44 günlük Vətən müharibəsinin xalqımızın yaddaşında silinməz izlər buraxdığını və əldə olunmuş Qələbənin Azərbaycan tarixinə qızıl hərflərlə yazıldığını qeyd ediblər.

Rayon məktəblilərinin təqdimatında şəhidlərin xatirəsinə həsr edilmiş əbədi-bədii kompozisiya təqdim olunub.

Tədbir iştirakçıları sonda şəhidlərin xatirəsinə həsr olunan ağacəkmə kampaniyasında iştirak ediblər.