Gülnar Seyidli: Zəif tərəfləri qəbul etmək bacarığı güclülük əlamətidir
Bakı, 24 iyul, Günel Alıyeva, AZƏRTAC
AZƏRTAC Azərbaycanın məşhur blogerləri ilə müsahibələr silsiləsini davam etdirir. Növbəti həmsöhbətimiz psixoloq, motivasiya spikeri, bloger, Venuslab bloqunun qurucusu Gülnar Seyidlidir.
Gülnar bloqunun necə inkişaf etdiyindən danışıb, həmçinin bu işə yeni başlayan blogerlərə məsləhətlər verib.
- Gülnar, bloqunuz nədən başladı?
- Psixologiya mənim ikinci ixtisasımdır. Əvvəlcə 636 balla daxil olduğum Azərbaycan-Fransız Universitetində geofizika mühəndisliyi ixtisası üzrə təhsil alırdım. Bu, mənim şəxsi seçimim idi və təhsilimə çox böyük həvəslə başladım. Lakin bir qədər sonra anladım ki, mühəndislik məni heç də cəlb etmir. Sosial şəbəkələrin çox populyarlaşdığı o illərdə karantin rejimi tətbiq edilmişdi və mənə sevinc gətirəcək bir məşğuliyyət tapmaq qərarına gəldim. Beləliklə, aromaterapiya məhsulları yaratmağa başladım. Abunəçilərim ilə ünsiyyət əsnasında onların travmalarını daha dərindən dərk etmək və daha ətraflı təhlillər aparmaq ehtiyacı hiss etdim. Aromaterapiyanın müalicə üçün kifayət etmədiyi qənaətinə gəldim. Bu, yalnız stimullaşdırıcı və həvəsləndirici amildir. Məni insanların seçimləri və davranışlarının arxasında duran səbəblər həmişə maraqlandırıb. Əslində, bu maraq məndə hələ yeniyetmə dövründə yaranmışdı, sadəcə mən o vaxt psixologiya ilə o qədər dərindən tanış deyildim.
- Bloqunuzun tam mənada məşğuliyyətə çevrildiyini nə vaxt anladınız?
- Zaman keçdikcə, insanlarla ünsiyyətin mənə həzz və ilham verdiyini gördüm, ona görə də bloqa daha çox vaxt ayırmağa başladım və bunun məni həqiqətən də cəlb etdiyini anladım. Hər şey öz-özünə inkişaf edirdi, yəni bloqumu tanıtmaq üçün qarşıma konkret məqsəd qoymurdum.
- Sizcə, uğurunuzun sirri nədədir?
- Uğur çox geniş anlayışdır. Düzünü desəm, indi olduğum yeri tam uğur adlandırmazdım, çünki həyatımla bağlı böyük planlarım var. Lakin əsas sirr, məncə, nəzakət və səmimiyyətdədir.
- Ölkəmizdə blogerliklə bağlı vəziyyət necədir?
- Blogerlik təkcə burada deyil, bütün dünyada inkişaf edir. İnsanlar bu sahədə öz üzərlərində daha çox işləməlidirlər, çünki bloqlardakı auditoriya istənilən şirkətdən daha geniş ola bilər. Bu, daha çox sayda insana müraciət etmək və fikirləri daha geniş miqyasda paylaşmaq imkanı verir.
- Sizcə, gələcəkdə blogerliyi nələr gözləyir?
- Düşünürəm ki, bu sahə inkişafa doğru irəliləyir. Bilirsiniz, əgər insan bu sahəyə aid deyilsə, zaman keçdikcə onun bu sahəyə marağı yox olur və o, ayrılır. İndi bir çoxları sosial medianın, blogerlərin və təsir edənlərin vəziyyətindən narahatdır, lakin mən hesab edirəm ki, bu sahəyə həqiqətən aidiyyəti olmayanlar zamanla onu tərk edəcəklər.
- Bu işlə yenicə məşğul olmağa başlayan blogerlərə hansı məsləhətləri verərdiniz?
- Öncə, onlara cəsarətli olmağa, öz auditoriyasının maraq və zövqünə uyğun yazılar hazırlamağa çalışmağı məsləhət görərdim. Mən, həmçinin bir mövzuya diqqəti cəmləməyi tövsiyə edirəm. Bloqun bir konkret mövzusu olmalıdır. Məsələn, əgər bu psixologiyadırsa, bloq klinik psixologiya və ya başqa bir konkret sahəyə həsr oluna bilər. Bloq bir mövzuya yönəldildikdə, uyğun auditoriya tapmaq daha asan olacaq və blogerlər oxucularından cavab reaksiyası və sevgi alacaqlar.
- Özünü həvəssiz və ya ruhdan düşmüş hiss edən insanlara nəyi məsləhət görərdiniz?
- Birincisi, onlar bunun hər kəslə baş verdiyini dərk etməlidirlər. Hər bir insan həyatının müxtəlif dövrlərində oxşar mərhələlərdən keçir. Hətta zirvələrə çatmış uğurlu insanlar da keçmişdə uğursuzluqlar və demotivasiya anlarını yaşadığını, özlərini kədərli və tənha hiss etdiyini bildirirlər. Belə anlarda daxili səsinizə qulaq asmağı məsləhət görürəm. Məntiqlə hərəkət etdikdə və sadəcə nəfəsimizə diqqət yetirdikdə, əsl istəklərimizi anlaya bilirik. İnsan həqiqətən nə istədiyini anladıqda, motivasiya əldə edir.
Motivasiyanın hərəkətdən yarandığını da unutmamaq lazımdır. Məsələn, bir layihə üzərində işləməlisiniz, lakin ilhamınız yoxdursa, motivasiya özü sizə gəlməyəcək. Yalnız işə başladıqdan sonra motivasiyanı tədricən hiss etməyə başlayacaqsınız. Mən tez-tez üç dəqiqə qaydası haqqında danışıram: bir tapşırığı yerinə yetirmək üçün özünüzə üç dəqiqə vaxt versəniz, bunu həqiqətən də etmək istəyib-istəmədiyinizi daha yaxşı dərk edəcəksiniz. Ola bilsin ki, davam etmək istədiyiniz ortaya çıxacaq.
- Şəxsi inkişaf və motivasiya üçün hansı kitabları və mənbələri tövsiyə edirsiniz?
- Hesab edirəm ki, şəxsi inkişaf üçün motivasiyalı videolara baxmaq və motivasiya üzrə kitablar oxumaq bir nöqtəyə qədər kömək edə bilər. Lakin əgər daim təkcə motivasiya ilə məşğul olursunuzsa, bu mövzuda kitab oxuyub videolara baxırsınızsa, eyni zamanda, heç bir hərəkət etmirsinizsə, bu, çıxış yolu tapmayan daxili potensialın yığılmasına gətirib çıxarır və nəticədə insanda xaos yaradır.
Düşünürəm ki, hər bir insan Devid Bernsın “Gözəl hal-əhval” kitabını oxumalıdır, bu, özünü daha yaxşı anlamağa, daxili mənliyi araşdırmağa və düşüncələrimizdə özümüz üçün yaratdığımız travmaların öhdəsindən gəlməyə kömək edir. Əminəm ki, kitabı oxuyan hər kəs onu təkrar mütaliə etmək istəyəcək.
- Başqa insanlara güclü tərəflərini tapmağa və onlardan tam istifadə etməyə necə kömək edirsiniz?
- Öncə qeyd etmək istəyirəm ki, insanın öz güclü tərəflərini tapmaq bacarığı onun özünün zəif tərəflərinin dərk və qəbul edilməsindən başlayır. Hər bir insanın ən güclü tərəfi zəif cəhətlərini görmək və onları qəbul etmək bacarığından ibarətdir. İnsan öz zəif cəhətlərini nəzərə alaraq yaşamağı öyrənəndə, daha güclü olur. Mən insanlara zəif tərəflərini qəbul etməyə və onlarla işləməyə kömək edirəm.
Bölmənin digər xəbərləri
