Gürcüstanın Kvemo Kartli regionunun nümayəndə heyəti Milli Məclisdə olub
Bakı, 14 iyul, AZƏRTAC
İyulun 14-də Milli Məclisin Gürcüstanla parlamentlərarası əlaqələr üzrə işçi qrupunun rəhbəri Arzu Nağıyev Gürcüstanın Kvemo Kartli regionunun qubernatoru Giorgi Doxturişvilinin rəhbərlik etdiyi nümayəndə heyəti ilə görüşüb.
AZƏRTAC xəbər verir ki, görüşdə Arzu Nağıyev son vaxtlar parlamentlərarası dostluq qruplarının görüşlərinin mütəmadi olaraq keçirildiyini bildirib. Qeyd edilib ki, ölkələrimiz arasında münasibətlərin yalnız böyük layihələrin həyata keçirilməsi ilə deyil, həm də parlamentlər səviyyəsində inkişaf etdirilməsi istiqamətində işlər görülür.
İkinci Qarabağ müharibəsindən danışan işçi qrupunun rəhbəri müharibə zamanı Gürcüstanın dost ölkə kimi Azərbaycanın haqlı mövqeyini dəstəklədiyini deyib.
Gürcüstanın Kvemo Kartli regionu ilə Azərbaycanın rayonları arasında qardaşlaşma haqqında anlaşma memorandumunun imzalanmasına toxunan deputat qeyd edib ki, bu, hər iki ölkənin bölgələri arasında münasibətlərin daha da möhkəmlənməsinə, iqtisadiyyatın, turizmin inkişafına təkan verəcək.
Azərbaycana ilk dəfə səfər etdiyini deyən Gürcüstanın Kvemo Kartli regionunun qubernatoru Giorgi Doxturişvili rəhbərlik etdiyi nümayəndə heyətinə göstərilən qonaqpərvərliyə görə minnətdarlığını çatdırıb.
Ölkələrimizin regionları arasında imzalanmış qardaşlaşma haqqında anlaşma memorandumundan danışan nümayəndə heyətinin rəhbəri diqqətə çatdırıb ki, bu sənəd hər iki ölkənin rayonları arasında əməkdaşlığın inkişafı üçün mühüm əhəmiyyət daşıyır. Vurğulanıb ki, bu, eyni zamanda, insanlararası təmasların intensivləşməsinə də töhfəsini verəcək.
Ölkəmizin Vətən müharibəsində qazandığı Qələbədən məmnun olduqlarını bildirən Giorgi Doxturişvili Gürcüstanın hər zaman Azərbaycanın ərazi bütövlüyünü dəstəklədiyini bir daha xatırladıb.
Gürcüstanın əməkdaşlığa hər zaman açıq olduğunu deyən G.Doxturişvili ölkəsinin Azərbaycanla əlaqələrin inkişafında böyük əhəmiyyət verdiyini qeyd edib.
Sonra çıxış edən Milli Məclisin deputatları Məzahir Əfəndiyev və Cavid Osmanov Azərbaycan ilə Gürcüstan arasında iqtisadi, mədəni, humanitar və bir çox digər sahələri əhatə edən əlaqələrin mövcud olduğunu vurğulayıblar. Qeyd edilib ki, strateji müttəfiq, dost və qonşu ölkələr olan Azərbaycan və Gürcüstan Cənubi Qafqazda təhlükəsizliyinin təmin edilməsində birgə səylər göstərmək əzmindədirlər.
Söhbət zamanı, həmçinin Azərbaycan ilə Gürcüstan arasında əlaqələrin dinamik inkişafından məmnunluq ifadə olunub. Əminliklə bildirilib ki, Azərbaycan-Gürcüstan münasibətləri bundan sonra da inkişaf edəcək və möhkəmlənəcəkdir.
Bölmənin digər xəbərləri
