SİYASƏT
Hazırda Paşinyanı Qarabağdakı hərbçilərin taleyi deyil, öz hakimiyyətini necə qoruyacağı düşündürür
Bakı, 2 oktyabr, AZƏRTAC
Azərbaycanın siyasi-hərbi və diplomatik sahədə Ermənistanı məğlubiyyətə uğratması, Ordumuzun əks-hücumla Ermənistanın silahlı birləşmələrini darmadağın etməsi, texnikasını məhv etməsi, ələ keçirməsi, eləcə də düşmən ölkənin informasiya cəbhəsində də iflic vəziyyətə düşməsi təcavüzkar ölkənin siyasi-hərbi elitasını çıxılmaz vəziyyətə salıb. Hazırda Paşinyanı Qarabağdakı hərbçilərin taleyi deyil, öz hakimiyyətini necə qoruyacağı düşündürür.
Bu fikirləri AZƏRTAC-a açıqlamasında Yeni Azərbaycan Partiyası Nizami rayon təşkilatının sədri, Milli Məclisin deputatı Sədaqət Vəliyeva deyib.
Ermənistanın işğal etdiyi torpaqlardan hissə-hissə çıxarılmaqda olduğunu deyən Sədaqət Vəliyeva qeyd edib: “İlk növbədə, hərbi əməliyyatların davam etməsi Ermənistanı psixoloji baxımdan daha çox sarsıdır. Bu psixoloji sarsıntı nəinki hərbçiləri ruhdan salır, döyüşmək imkanlarını iflic edir, hətta erməni cəmiyyətində ordusuna və hakimiyyətinə böyük inamsızlıq formalaşdırır. Son 5 gün ərzində Ermənistanın 200-dək tankı və digər zirehli texnikası, 228 ədəd artilleriya qurğusu, yaylım atəşli raket sistemi, minaatanları, 30 ədəd hava hücumundan müdafiə vasitəsi, 6 komanda-idarəetmə və komanda-müşahidə məntəqəsi, 5 silah-sursat anbarı, 110-dan artıq avtomobil texnikası, 1 ədəd “S-300” zenit-raket kompleksi məhv edilibsə, eyni zamanda, 2300 nəfərədək canlı qüvvə itirilibsə, yaralanıbsa, demək ki, bu ölkə artıq məğlub edilib. Əgər bir ordunun əsgər və zabitləri silah-sursatlarını, hərbi texnikalarını atıb qaçırsa, bu ordu artıq rəzil gününə salınıb. Ermənistanın ordusu haqqında yaratdığı mifi 2016, 2018 və 2020-ci illərdə dağıdan Azərbaycan Silahlı Qüvvələri sentyabrın 27-dən başlanan əks-hücumla düşməni bir daha darmadağın edib.
Deputat diqqətə çatdırıb ki, Azərbaycan Ordusu Ermənistan hərbi birləşmələrinə vurduğu zərərin maddi tərəfi də çox yüksəkdir. “Hesablama aparsaq görərik ki, bir tankın qiyməti təxminən 2-3 milyon dollardırsa, demək hazırda 200-dək tank və texnikası məhv edilən Ermənistana 400-600 milyon dollar zərər vurulub. Təkcə Ordumuzun məhv etdiyi “S-300” zenit-raket kompleksinin qiyməti 115 milyon dollardır. Eyni zamanda, buraya artilleriyanı və digər texnikaları, silah-sursatları da əlavə etsək, demək ki, son 5 gün ərzində Ermənistana 1-1,5 milyard dollar zərər vurulub. Əgər Ermənistan zərərləri nəzərə almasa, işğalçı qoşunlarını ərazilərimizdən tez bir zamanda çıxarmasa, zərər 4-5 milyard dollara qədər arta bilər. Bu isə Ermənistanın çöküşü demək olacaq. Üstəlik, 2300 nəfərdən artıq ölən və yaralananın xərcləri, ailələrinin çətinliklərinin qarşılanması, xəstəxana xərcləri və başqa problemlər Ermənistanı çox çətin vəziyyətə salacaq. Diqqət yetirin, Ermənistanın hazırda dövlət büdcəsi təxminən 4 milyard dollardır. Beləliklə də, aydın olur ki, son 5 gün ərzində Ermənistana dövlət büdcəsinin 25-30 faizi miqdarında zərər vurulub. Əgər belə davam etsə, bütövlükdə Ermənistanın dövlət büdcəsinin 100 faizi miqdarında zərər dəyəcək. Bunun da nə demək olduğunu geniş şərh etməyə ehtiyac yoxdur”.
“Azərbaycan Ordusunun Ermənistan üzərində ardıcıl qələbəsi işğalçı ölkədə ictimai-siyasi vəziyyəti də gərginləşdirib”, - deyən Sədaqət Vəliyeva əlavə edib ki, Paşinyanı hakimiyyətdən salmaq üçün keçmiş kriminal rejimin nümayəndələri, eləcə də müxalifət hərəkətə keçib. “Hazırda elə bir gün yoxdur ki, Yerevanda və Ermənistanın müxtəlif yerlərində mitinqlər, etiraz aksiyaları keçirilməsin. Qarabağdakı vəziyyət Ermənistanda hakimiyyətə gəlmək istəyənlər üçün bir fürsətə çevrilib. Ona görə də bu gün Paşinyan çaşqın durumdadır. O, həm cəbhədə vəziyyəti düzəldə, həm də yalanları ilə beynəlxalq aləmi inandıra bilmir. Bu isə onun hakimiyyətinin bacarıqsızlığını, özünün isə səriştəsizliyini sübut edir. Bir sözlə, bugünkü vəziyyət onu göstərir ki, Qarabağ müharibəsi Paşinyan totalitarizminin də sonunu gətirmiş ola bilər”, - deyə deputat fikirlərini yekunlaşdırıb.