HƏMVƏTƏNİMİZ MOSKVA ŞƏHƏR DUMASINA DEPUTATLIĞA NAMİZƏDDİR
İlqar Hacıyev hüquq elmləri namizədi, 1995-ci ildən Moskva Vəkillər Kollegiyasının üzvüdür. 2003-cü ildə Rusiya Vəkillər Gildiyası onu “Rusiyanın Fəxri vətəndaşı” adına layiq görmüşdür. O, İkinci dərəcəli “Vətənin müdafiəçisi xaçı” döş nişanı və “Vicdanlı və yüksək peşəkar əməyə görə” medalı ilə təltif olunmuşdur.
İ.Hacıyev Azərbaycan diasporunda ictimai fəaliyyətlə ötən əsrin 90-cı illərindən məşğul olur. O, xeyriyyəçilik işləri elə də tanınır, Moskvanın bu dairəsində yaşayan müharibə və əmək veteranlarına, pensiyaçılara, azərbaycanlı uşaqların da təhsil aldığı 157 nömrəli məktəbə , “Aeroport” rayonundakı digər uşaq müəssisələrinə daim maddi yardım edir.
Həmvətənimiz elə həmin rayonda yerləşən və hazırda Rusiyadakı Azərbaycan diasporunun mədəniyyət mərkəzi kimi istifadə olunan “Bakı” kinokonsert kompleksinin bərpasının təşəbbüsçülərindən və sponsorlarından biridir. ÜAK-ın Moskva regional bölməsi İ.Hacıyevin başçılığı ilə dairənin və rayonun sakinləri üçün burada daim mədəni-kütləvi tədbirlər keçirir.
Həmvətənimiz deyir ki, seçkiqabağı kampaniyaya Rusiya cəmiyyətində baş verən proseslərə kənardan baxa bilmədiyi, cəmiyyətin inkişaf etdirilməsi və xalqın rifah halının yüksəldilməsi işinə öz layiqli töhfəsini vermək istədiyi üçün qoşulmuşdur. İlqarın sözlərinə görə, Moskva Şəhər Dumasına seçilərsə, bu, diasporumuz üçün faydalı olacaqdır, çünki həmvətənlərə qayğı və onların hüquqi müdafiəsi onun daim diqqət mərkəzində olacaqdır.
Bölmənin digər xəbərləri
