Bakı, 25 sentyabr, AZƏRTAC

Sentyabrın 25-də Azərbaycan Hərb Tarixi Muzeyində “Vətən müharibəmizin qəhrəman şəhidi!” adlı anım tədbiri keçirilib.

Əmək və Sosial Münasibətlər Akademiyası ilə birgə təşkil edilən tədbir Vətən müharibəsi şəhidi, əsgər Aqşin Şahin oğlu Novruzovun xatirəsinə həsr olunub.

AZƏRTAC xəbər verir ki, mərasimdə şəhidin ailə üzvləri və yaxın qohumları - şəhidin yaxın dostları, döyüş yoldaşı, həmçinin Müdafiə Nazirliyinin İdarə və müəssisələrinin nümayəndələri, orta təhsil müəssisələrinin tələbə və müəllim heyəti, iştirak ediblər.

Anım tədbirində muzey rəisi ehtiyatda olan polkovnik Əzizağa Qəni-zadənin, Əmək və Sosial Münasibətlər Akademiyasının prorektoru Fərhad Möhbalıyevin və şəhidin müəllimi, tarix üzrə fəlsəfə doktoru Vahid İsmayılovun, şəhidin anası Elnarə Novruzovanın, dekan Hicran xanım Mirzəyevanın çıxışları dinlənililib.

Qeyd olunub ki, Aqşin 1998-ci ildə Bakıda anadan olub. Orta məktəbi uğurla bitirən Aqşin ali məktəbi də böyük müvəffəqiyyətlə başa vurub. Azərbaycana layiqli vətəndaş olmağı arzulayan gənc əvvəlcə Lütfi Zadə adına Texniki-Humanitar Liseyi bitirib. Sonra ali təhsilini Əmək və Sosial Münasibətlər Akademiyasında alıb. 2020-ci ilin yayında Vətənə əsgəri borcunu vermək üçün ordu sıralarına həqiqi hərbi xidmətə çağırılır, topçu əsgəri ixtisasına yiyələnir.

Sentyabrın 27-də düşmənin cəbhədə təxribatlar törətməsi hərbi əməliyyatların başlanması üçün qığılcım rolunu oynadı. Müharibə zamanı ən müasir silahların tətbiq edilməsinə baxmayaraq, zabit, gizir və əsgərlərimizin qəhrəmanlığı, fədakarlığı sayəsində düşmən üzərində tarixi Zəfər qazanıldı. Noyabrın 9-dək davam edən döyüşlər Ermənistanın tam məğlubiyyəti - kapitulyasiyası ilə başa çatdı.

Məlumat verilib ki, Vətən müharibəsinin 6-cı günündə Azərbaycan əsgəri Aqşin Novruzov ayağından yaralansa da, müalicə olunduqdan sonra yenidən ön cəbhəyə yollanıb. Oktyabrın 13-də Aqşin Novruzov Kəlbəcər istiqamətində gedən döyüşlərdə qəhrəmancasına həlak olub.

Şəhidlik zirvəsi bütün yüksəkliklərdən ucada dayanır. Bu zirvəyə qalxmaq hər kəsə nəsib olmur. Yalnız müqəddəs amallar uğrunda çarpışan, qorxu nə olduğunu bilməyən, Vətən və xalq yolunda canını fəda etməkdən çəkinməyən cəsarətli və qorxmaz Vətən oğulları bu uca zirvəyə yüksəlirlər. Onlar öz ölümləri ilə bir əbədilik qazanırlar. Əbədiyyət ünvanı qazanan Aqşin Novruzov da belə Vətən oğullarından biri idi.

Prezident İlham Əliyevin müvafiq sərəncamlarına əsasən Aqşin Novruzov ölümündən sonra “Vətən uğrunda”, “Kəlbəcərin azad olunmasına görə” və “Hərbi xidmətlərə görə” medalları ilə təltif edilib. Bakıda şəhid Aqşin Novruzovun vaxtilə təhsil aldığı Lütfi Zadə adına Texniki-Humanitar Liseydə onun adını daşıyan xatirə lövhəsi açılıb.

İllər ötüb, qərinələr dolaşsa da, şəhidlər həmişə böyük ehtiram və minnətdarlıq duyğuları ilə yad edilir, xatirələrinə dərin ehtiram bəslənilir. Vətən uğrunda, ölkəmizin ərazi bütövlüyü naminə canını fəda etmiş Aqşin Novruzovun da xatirəsi yaddaşlarda həmişəlik yaşayacaq.

Tədbirdə Aqşin Novruzova həsr olunmuş “Vətən haqqı” adlı sənədli film nümayiş olunub.

Bədii hissədə Müdafiə Nazirliyinin Həzi Aslanov adına Ordu, İdeoloji iş və Mədəniyyət Mərkəzinin solistlərinin ifasında hərbi vətənpərvərlik musiqiləri səsləndirilib.