Hərbi texnikaların kiçik modelləri - tanklar, zirehli maşınlar və təyyarələr - Reportaj
Bakı, 2 iyul, AZƏRTAC
Azərbaycan Ordusunda istifadədə olan hərbi texnikaların, tankların, zirehli maşınların və təyyarələrin dəqiq mini formalarını hazırlamışıq. Belə kiçik modelləri hazırlamaq çətindir, uzun müddət vaxt və səbir tələb edir. Burada olan hərbi avtomobillər 1/16 miqyasda böyük tanklardır. Bunların əksəriyyəti Azərbaycanda əl ilə sıfırdan yığılıb. Hazırlanan modellər real texnika kimi hərəkət edir, səs çıxarır və s.
Bunu AZƏRTAC-a açıqlamasında Azərbaycan Hərb Tarixi Muzeyində yeni hərbi-texnika maket sərgisi stendini hazırlayan Bakı Modelistlər Klubunun sədri İlqar İsmayılov deyib.
Muzeyin birinci mərtəbəsində sərgilənən stend barədə məlumat verən İlqar İsmayılov deyib: “Klubun əl işləri nəinki ölkə daxilində, respublikanın sərhədlərindən kənarda - xaricdə də böyük marağa səbəb olur. Həmin modellər, hətta beynəlxalq yarışlarda müxtəlif mükafatlara layiq görülüb. Nümunə üçün deyə bilərəm ki, "T-28" tankının maketi İstanbulda keçirilən sərgidə ikinci yerə və gümüş medala layiq görülüb. Burada nümayiş etdirilən “Yunkers-88” modeli 1941-1945-ci illər İkinci Dünya müharibəsi zamanı Bakının üzərində uçuş həyata keçirərkən vurulan təyyarənin eynisidir.
Bakıda “TEKNOFEST Azərbaycan” Aerokosmik və Texnologiya Festivalı keçirildiyində isə “Türk Yıldızları” Azərbaycanın səmasında yüksək pilotaj bacarıqlarını göstəriblər.
“F-16” təyyarələri isə həmin qrupun bir üzvü idi”.
İlqar İsmayılov yığdığı bir çox hərbi texnikaların hissələrini də özü hazırlayır. Həmin modellərin əksəriyyəti radioidarəetmə sistemlidir.
Bakı Modelistlər Klubunun üzvü Namiq Bəşirov deyib ki, sərgidə, həmçinin 44 günlük Vətən müharibəsində istifadə olunan hərbi texnikaların kiçik modelləri də var. “Ural” markalı avtomobillərin üzərində qurulmuş “Qrad” yaylım atəşli reaktiv sistemləri, həmin avtomobilin qoşqusunda D-20 topları, “UAZ” markalı yükdaşıyan və sanitar nəqliyyat vasitələri, ordu rəhbərliyini daşıyan və dağa qalxa bilən “Jeep”lər, indiyədək istifadə olunan “KamAZ”ların maketləri reallıqdan heç də fərqlənmir.
İ.İsmayılovın sözlərinə görə isə o müharibə vaxtı 44 günün hər birində qeydlərini aparır, avtomobillər, texnikalar barədə məlumatları müxtəlif mənbələrdən toplayırmış: "Avtomobillərin işləməsi barədə internetdəki müəyyən xəbərləri oxuyurdum. Çünki bu proses mühəndis mütəxəssis kimi mənim üçün çox maraqlı idi. Bunların bəzilərini özüm düzəltmişəm. Lakin rəhbəri olduğum klubun üzvləri olan kolleksiyaçılar, aviasiya mütəxəssisləri də bu maketlərin üzərində işləyiblər.
Tanklardan birini Yekaterinburqdan olan bir nəfər rusiyalı dörd il yığdı. Həmin illər ərzində mən bu prosesi internetdən izləyirdim. Maketin yığılmasının beşinci ilində o dedi ki, bu modeli yığmaq mümkün deyil. Mən isə bir ay ərzində həmin tankın eynisini düzəltdim. Ermənilər sosial şəbəkələrdə bunun qeyri-mümkün olduğunu yazırdılar. Yığdığım model dünyada yeganə olan panzera tankının maketidir. Həmin tankın şəklini çəkdim və həmin erməniyə göndərdim. Mənfur düşmənimiz isə bir azərbaycanlı olduğum üçün mənim uğurumu həzm edə bilmədi və panzera tankını hansısa məşhur şirkətin düzəltdiyini iddia edib yazmağa başladılar. Həmin “T-28” tankı hazırda Azərbaycan Hərb Tarixi Muzeyində sərgidə nümayiş olunur”.
Bakı Modelistlər Klubunun sədri ən ucuz və ən bahalı modelləri də diqqətə çatdıraraq vurğulayıb: “Ən ucuz modelin qiyməti 400, ən bahalı isə 1500 evro təşkil edən panzera tankıdır”.
Bölmənin digər xəbərləri
