HERNINQ ŞƏHƏRINDƏ FİLA-NIN NÖVBƏTİ TOPLANTISI KEÇİRİLMİŞDİR
Bakı, 20 sentyabr (AZƏRTAC). Sentyabrın 20-də Danimarkanın Herninq şəhərində Beynəlxalq Güləş Federasiyasının (FİLA) toplantısı keçirilmişdir.
Əvvəlcə toplantıda FİLA-nın qaydalara etdiyi yeni dəyişikliklər barədə müzakirələr aparılmışdır.
Sonra 2010-cu ildə güləş üzrə beynəlxalq yarışların, çempionatların keçiriləcəyi ölkələrin hazırlığından bəhs edən təqdimatlar olmuşdur. 2010-cu ildə Bakıda keçiriləcək Avropa çempionatına hazırlıq barədə Azərbaycan Güləş Federasiyasının (AGF) Hakimlər Kollegiyasının sədri Əjdər Cəfərov məlumat vermişdir. Azərbaycanın bu cür mötəbər yarışa ev sahibliyi etməyə tam hazır olduğu bildirilmiş və Bakıda keçirilən yarışların FİLA tərəfindən yüksək qiymətləndirildiyi vurğulanmışdır. AGF tərəfindən hazırlanmış “Azərbaycan” filminin təqdimatı olmuşdur.
Toplantı zamanı FİLA-nın və digər ölkələrin nümayəndə heyətlərinə ölkəmizin tarixi, mətbəxi, turizm, mədəniyyət və incəsənət haqqında, AGF-nin fəaliyyəti, pəhləvanlarımızın bu günə qədər qazandığı uğurlar barədə məlumatların yer aldığı kitabçalar, multimedia materialları paylanmışdır.
######
Bölmənin digər xəbərləri
