HƏYATA KEÇİRİLƏN TƏDBİRLƏR ÖZ BƏHRƏSİNİ VERİR

11.10.2006 [12:40]
Çap et
A⁺ A^-

“Azərenerji” ASC-nin mətbuat xidmətindən AZƏRTAC-a bildirmişlər ki, Lənkəran paylayıcı elektrik şəbəkəsinin (PEŞ) xidmət göstərdiyi ərazidə əhali tərəfindən istehlak olunan elektrik enerjisi haqqının tam şəkildə ödənilməsi sahəsində həyata keçirilən tədbirlər öz bəhrəsini verir.

Sentyabrda istehlakçılar 14 milyon kilovat-saatdan çox elektrik enerjisi ilə təchiz edilmiş və 30 min 473 abonentin 25 min nəfəri ödənişə cəlb olunmuşdur. Avqustda 105 min manat, sentyabrda isə 117 min manat enerji haqqı yığılmışdır.

İstehlaka yönəldilən elektrik enerjisi haqqının ödənişini 100 faizə çatdırmaq üçün PEŞ-də bütün qüvvələr səfərbərliyə alınmışdır. Lənkəran televiziya kanalı vasitəsilə, mütəmadi olaraq, maarifləndirmə və təbliğat xarakterli verilişlər, “Pulunu ödə, işığını al!” devizi altında reklam yayımlanır. Şəbəkə çərçivəsində digər inzibati tədbirlər də həyata keçirilir.

Sadalanan tədbirlərlə yanaşı, bölgədə sayğaclaşdırma prosesi də sürətlə aparılır. Bu günədək 4600 sayğac quraşdırılmışdır.