“HEYDƏR ƏLİYEV. MÜSTƏQİLLİYİMİZ ƏBƏDİDİR” ÇOXCİLDLİYİNİN ON ALTINCI KİTABI ÇAPDAN ÇIXMIŞDIR
Ulu öndər Heydər Əliyev bu sözləri 1998-ci il iyunun 9-da Qazaxıstanın paytaxtı Astanaya səfərə gedərkən hava limanında jurnalistlərin suallarına cavabında demişdir.
“Siz zəmanəmizin görkəmli dövlət xadimisiniz. Azərbaycanın müstəqilliyinin və təhlükəsizliyinin möhkəmləndirilməsində, son illər gənc Azərbaycan Respublikasının dünya birliyində layiqli yer tutmasında Sizin misilsiz xidmətləriniz var. Sizin rəhbərliyiniz altında Azərbaycanda hüquqi, demokratik, dünyəvi dövlət quruculuğu, iqtisadi islahatlar müvəffəqiyyətlə həyata keçirilmişdir və bu sahədə əldə olunmuş böyük uğurları xüsusi vurğulamaq istəyirəm. Bu gün Azərbaycanı Sizsiz, Sizi Azərbaycansız təsəvvür etmək mümkün deyildir”.
Bu isə elə həmin gün dövlətimizin başçısı ilə görüşdə Özbəkistan Prezidenti İslam Kərimovun söylədiyi sözlərdir.
Eyni gündə səslənmiş, bir-birini tamamlayan, 1993-cü ilin iyunundan ötən beş il ərzində ölkəmizin, xalqımızın həyatında, taleyində baş vermiş tarixi dəyişikliklərin miqyasını əks etdirən bu fikirlər “Heydər Əliyev. Müstəqilliyimiz əbədidir” çoxcildliyinin “Azərnəşr” tərəfindən yenicə çapdan buraxılmış növbəti - on altıncı cildindən götürülmüşdür.
İtaliyanın milli bayramı münasibətilə təşkil edilmiş rəsmi qəbuldakı nitq ilə açılan kitabda Prezident Heydər Əliyevin 1998-ci ilin iyun-iyul ayları ərzindəki çıxışları, nitqləri, bəyanatları, müsahibələri, məktubları, müraciətləri, respublikada aparılan geniş iqtisadi-siyasi islahatlara həsr olunmuş materiallar toplanmışdır. Kitabın buraxılışına məsul Prezidentin İcra Aparatının rəhbəri, fəlsəfə elmləri doktoru, professor Ramiz Mehdiyevdir.
Kitabda ümummilli liderimizin Astanada türkdilli ölkələrin dövlət başçılarının zirvə toplantısında və Qazaxıstanın yeni paytaxtının beynəlxalq təqdimatında, zəmanəmizin görkəmli musiqiçisi Mstislav Rostropoviçin “Şöhrət” ordeni ilə təltif olunması mərasimində nitqləri, Rumıniya Prezidentinin Azərbaycana rəsmi səfəri ilə bağlı çıxışı və nitqi, Azərbaycan polisinin 80 illik yubileyi və polis gününə həsr olunmuş yığıncaqda, Bibiheybət məscid-ziyarətgah kompleksinin açılış mərasimində nitqləri dərc edilmişdir.
Çoxcildliyin növbəti kitabındakı materialların əksər hissəsi ulu öndərin 1998-ci ilin iyulunda Böyük Britaniya və Şimali İrlandiya Birləşmiş Krallığına rəsmi səfəri ilə bağlıdır. Həmin səfərin gedişində keçirilmiş yüksək səviyyəli görüşlər, səmərəli danışıqlar, imzalanmış sənədlər, dünyanın nüfuzlu mətbuat orqanlarına verilmiş müsahibələr Böyük Britaniya ilə Azərbaycan arasında əməkdaşlığın inkişafında yeni mərhələnin başlanğıcını qoymaqla yanaşı, ölkəmiz barədə həqiqətlərin Avropaya, o cümlədən dünyaya daha geniş çatdırılması baxımından da mühüm rol oynamışdır.
AZƏRTAC-ın materialları əsasında hazırlanmış kitabda görkəmli ədəbiyyat və incəsənət xadimləri ilə görüşlər, Ermənistanın təcavüzü nəticəsində yurd-yuvasından didərgin düşmüş qaçqın və məcburi köçkünlərə, eləcə də milli adət və ənənələrə böyük diqqət və qayğı da öz əksini tapmışdır.
Bölmənin digər xəbərləri
