“Heydər zirvəsi”nə kütləvi yürüş uğurla başa çatmışdır
Bakı, 13 may (AZƏRTAC). Azərbaycan xalqının ümummilli lideri Heydər Əliyevin anadan olmasının 91-ci ildönümü ilə əlaqədar Böyük Qafqazın Şahdağ silsiləsinin Qızıl Qaya massivində dəniz səviyyəsindən 3751 metr hündürlükdə yerləşən “Heydər zirvəsi”nə təşkil olunmuş kütləvi yürüş uğurla başa çatmışdır.
Bu barədə AZƏRTAC-a Ekologiya və Təbii Sərvətlər Nazirliyinin (ETSN) mətbuat xidmətindən məlumat verilmişdir.
Məlumatda bildirilir ki, yürüşə Azərbaycanın bütün bölgələrindən rekord sayda insan qatılmışdır. Mayın 3-dən başlayaraq ayrı-ayrı qruplara bölünmüş yürüş iştirakçıları ETSN tərəfindən Şahdağ Milli Parkında yaradılmış Təşkilat Komitəsinin müəyyənləşdirdiyi marşruta uyğun olaraq bələdçilərin müşayiəti ilə “Heydər zirvəsi”nə doğru yürüş etmişlər. Yürüş iştirakçıları Qızıl Qaya massivinin ətəyində qurulmuş düşərgədə gecələdikdən sonra zirvəyə qalxmış, Azərbaycan dövlətinin memarı və qurucusu, dünya şöhrətli siyasi xadim, ümummilli lider Heydər Əliyevin əziz xatirəsini yad etmişlər.
Təşkilat Komitəsindən qeydiyyatdan keçən 650 nəfər bu möhtəşəm aksiyaya qoşulmaqla Ulu Öndərə sevgi və ehtiramlarını ifadə etmişlər. Bəzi yürüş iştirakçıları Qızıl Qaya massivinin ətəyində qurulmuş baza düşərgəsinə çatsalar da, ağır dağ şəraitinə uyğunlaşmadıqlarına, səhhətlərində yaranan problemlərə görə son nöqtəyədək irəliləməkdə çətinlik çəkmiş və bələdçilər tərəfindən onların geri dönməsi tövsiyə edilmişdir. Ümumilikdə “Heydər zirvəsi”nə 400-dən artıq ziyarətçi qalxmışdır.
“Heydər zirvəsi”nə yürüşlərin kütləvi hal alması nəzərə alınaraq bu ildən aksiya ETSN tərəfindən təşkil olunmuşdur. Kütləvi yürüşün iştirakçıları birdəfəlik giriş haqqından azad edilmişlər. Təşkilat Komitəsi tərəfindən aksiyanın mütəşəkkilliyi təmin olunmuş, o cümlədən yürüş marşrutu müəyyənləşdirilmiş, marşrut üzərində tam təchizatlandırılmış çadırlardan düşərgə qurulmuş, çətin relyef və iqlim şəraiti olan dağlarda insanların təhlükəsizliyi təmin edilərək yürüşlərin yüksək səviyyədə təşkilinə nail olunmuşdur.
Aksiya zamanı ətraf mühitin mühafizəsinə xüsusi diqqət yetirilmişdir. Görülmüş tədbirlər nəticəsində bütün növ tullantıların utilizasiyası həyata keçirilmiş və təbiətə heç bir mənfi təsir göstərilməmişdir.
Bölmənin digər xəbərləri
