SİYASƏT
HOLLANDİYANIN MİLLİ AZLIQLARI ÖLKƏNİN YERLİ ƏHALİSİ İLƏ HƏMRƏYDİR
Azərbaycan diasporu Prezident İlham Əliyevin fəal əməkdaşlıq barədə tövsiyəsinə əməl edərək, türk təşkilatları ilə birgə tədbirlər həyata keçirir.
Aprelin 21-də Niderlandın mayın 4-5-də qeyd edilən Milli Azadlıq bayramı ərəfəsində - Burxan Çarlakın başçılıq etdiyi Niderland İslam Kanalının təşəbbüsü ilə milli azlıqların ölkənin yerli əhalisi ilə həmrəylik aksiyası keçirilmişdir.
Niderlandın qeyri-hökumət müsəlman təşkilatlarının nümayəndələri Amsfort şəhərindəki keçmiş həbs düşərgəsində olmuşlar. 1941-1945-ci illərdə burada 35 mindən yuxarı məhbus, o cümlədən yəhudi, rus, Müqavimət hərəkatının fəalları həlak olmuşdur.
Tədbirdə Niderlandın Azərbaycan icmasını “Ana Vətən” Cəmiyyətinin üzvləri - rəssamlar Vəfa Hüseynova və Rasim Hüseynov təmsil edirdilər. Onlar Azərbaycan torpaqlarının Ermənistan tərəfindən işğal edilməsindən, bir milyondan yuxarı qaçqın və məcburi köçkünün öz doğma yurd-yuvalarından didərgin düşməsindən, habelə Xocalı soyqırımından söhbət açaraq vurğulamışlar ki, Niderlandın Azərbaycan icması münaqişələrsiz və zorakılıqsız dünyaya tərəfdardır və ölkənin həyatında fəal iştirak edir.
Hollandiya müsəlmanlarının həmrəylik aksiyası mayın 4-də Niderland II telekanalında “Həlak olanların anım günü” verilişində yayımlanacaqdır.
Yerli mətbuatın yazdığına görə, Niderland parlamentinin bəzi deputatlarının ölkənin müsəlman azlığı ilə indiki qarşıdurması şəraitində Hollandiya müsəlmanlarının yerli əhali ilə həmrəylik aksiyası çox aktualdır.