İki ayda elektrik enerjisi, qaz və buxar istehsalı sektorunda azalma olub
Bakı, 16 mart, AZƏRTAC
Yanvar-fevral aylarında elektrik enerjisi, qaz və buxar istehsalı, bölüşdürülməsi və təchizatı sektorunda 432,2 milyon manatlıq məhsul istehsal olunub və xidmətlər göstərilib.
AZƏRTAC Dövlət Statistika Komitəsinin məlumatlarına istinadla xəbər verir ki, 2020-ci ilin müvafiq ayları ilə müqayisədə istehsalın həcmində 3,1 faiz azalma müşahidə olunub.
Cari ilin iki ayında su təchizatı, tullantıların təmizlənməsi və emalı sektorunda istehsal olunmuş məhsulların dəyəri 0,6 faiz azalaraq 51,3 milyon manat təşkil edib.
Hesabat dövründə sənaye məhsulunun 6,1 faizi elektrik enerjisi, qaz və buxar istehsalı, bölüşdürülməsi və təchizatı sektorunda, 0,7 faizi isə su təchizatı, tullantıların təmizlənməsi və emalı sektorunda istehsal olunub.
Fevral ayında elektrik enerjisi, qaz və buxar istehsalı, bölüşdürülməsi və təchizatının istehsalçı qiymətləri indeksi əvvəlki ayla müqayisədə 100 təşkil edib. Su təchizatı, tullantıların təmizlənməsi və emalı sahələri üzrə sənaye məhsullarının istehsalçı qiymətləri indeksi isə yanvar ayı ilə müqayisədə 48,4 faiz çox olub.
Bölmənin digər xəbərləri
