İkinci Bakı Beynəlxalq turizm filmləri festivalı açılmışdır
Bakı, 25 iyun (AZƏRTAC, Gözəl Ağayeva). İyunun 25-də Nizami Kino Mərkəzində ikinci Bakı Beynəlxalq turizm filmləri festivalının açılış mərasimi keçirilmişdir.
AZƏRTAC xəbər verir ki, mərasimdə çıxış edən mədəniyyət və turizm naziri Əbülfəs Qarayev festivalın əhəmiyyətindən, ölkəmizdə turizm sahəsində qazanılan uğurlardan söz açmışdır.
Bildirilmişdir ki, ötən festivaldan uzun müddət keçməsə də, ikinci Bakı Beynəlxalq turizm filmləri festivalının iştirakçılarının, eləcə də nümayiş olunacaq filmlərin sayı əvvəlki ilə müqayisədə iki dəfə artmışdır. Bu isə həm ölkələrin, həm də yaradıcı insanların festivalı dəstəkləmələrini, onların öz maraqlı və dəyərli əsərlərini tədbirin münsiflər heyətinin diqqətinə çatdırmaq arzusunu bir daha təsdiqləyir.
Azərbaycanda turizmin yüksək sürətlə inkişafından danışan nazir müvafiq sahənin bilavasitə dövlətimizin başçısının diqqətində olduğunu vurğulamışdır.
Respublikanın turizm potensialının beynəlxalq tədbirlərdə, sərgilərdə, dünyanın müxtəlif televiziya kanallarında uğurla təbliğ edildiyini deyən nazir Əbülfəs Qarayev kino sənətinin bütün sahələrdə vacib olduğunu diqqətə çatdırmışdır. Bildirmişdir ki, kino vasitəsilə insanların ürəyinə tapılan yol estetik baxımından daha dərin və mənalı anlayışların formalaşdırılmasına, daha maraqlı təqdimatların keçirilməsinə şərait yaradır.
Bildirilmişdir ki, Mədəniyyət və Turizm Nazirliyi artıq bu vəhdəti sübut edərək turizm sahəsində də filmlərin təbliğinə başlamışdır. Azərbaycanın böyük turizm potensialının dünyada təbliğinin əhəmiyyətindən danışan nazir festivalın keçirilməsini yüksək qiymətləndirmişdir.
Tədbirin təşkilatçılarına təşəkkürünü bildirən nazir münsiflər heyətinə müvafiq işdə səmərəli, ədalətli, ümumi işimizə xidmət edəcək qərarların çıxarılmasını arzulamışdır.
Festivalın ilk günündə “Ölkə, region, şəhər” kateqoriyasından filmlər nümayiş olunmuşdur.
Festivala, ümumilikdə, 55 ölkədən 405 film göndərilmiş, onun müsabiqə proqramına 31 ölkədən 68 film daxil edilmişdir. Filmlər 6 kateqoriyada yarışacaqlar.
Müsabiqə proqramına Azərbaycanın 7 filmi də daxil edilmişdir.
Filmlərə Nizami Kino Mərkəzində, eləcə də axşam seanslarında Dənizkənarı Milli Parkda baxmaq mümkün olacaqdır.
Filmləri kinematoqrafçılardan, səyahət və turizm ekspertlərindən ibarət 7 nəfərlik beynəlxalq münsiflər heyəti qiymətləndirəcəkdir. Beynəlxalq münsiflər heyəti hər kateqoriyada 3 filmi müəyyən edərək mükafatlandıracaqdır. Birinci, ikinci, üçüncü yerləri tutan ekran əsərləri müvafiq olaraq qızıl, gümüş və bürünc medallara, eyni zamanda, diplom və pul mükafatlarına layiq görüləcəkdir. Festivalın ən yaxşı filminə isə “Qran-pri”, diplom və pul mükafatı veriləcəkdir.
Festival günlərində ustad dərsləri, eyni zamanda, nəzəri və əyani dərslər təşkil ediləcək, sonda gənc rejissorlar Bakı haqqında sənədli film çəkəcəklər.
İyunun 28-də festivalın bağlanış mərasiminin keçirilməsi nəzərdə tutulmuşdur.
Bölmənin digər xəbərləri
