İlisudakı “Uludağ” İstirahət və Turizm Mərkəzində yeni turizm mövsümü başlandı
Qax, 21 may (AZƏRTAC). Qax rayonunun İlisu kəndindəki “Uludağ” İstirahət və Turizm Mərkəzində yeni turizm mövsümünün başlanması ilə əlaqədar tədbir keçirilmişdir.
Rayon rəhbərliyinin, Qaxda fəaliyyət göstərən turizm mərkəzləri rəhbərlərinin, turistlərin, ictimaiyyət və KİV nümayəndələrinin iştirak etdiyi tədbirdə rayon icra hakimiyyəti başçısının müavini Ziyafət Xasıyeva bildirmişdir ki, bu gün Azərbaycanda digər sahələrlə yanaşı, turizm sahəsi də sürətlə inkişaf edir. Ölkə rəhbərliyi bu sahənin inkişafına diqqət və qayğı göstərir. Turizm sahəsində dövlət siyasətinin davamı kimi “Azərbaycan Respublikasında 2010-2014-cü illərdə turizmin inkişafına dair Dövlət Proqramı”nın qəbul edilməsi, 2011-ci ilin ölkəmizdə “Turizm ili” elan edilməsi bu qayğının bariz nümunəsidir.
“Uludağ” İstirahət və Turizm Mərkəzinin direktoru Zabit Əhmədov bildirmişdir ki, Azərbaycanda turizm ən perspektivli və yüksək potensiallı sahə hesab olunur. Ölkəmiz artıq xarici turistlər üçün cəlbedici məkana çevrilir. Gələn turistlərə yüksək standartlara uyğun xidmətin göstərilməsi ən vacib məsələlərdən biridir.
Mərkəzin rəhbəri daha sonra kompleksin imkanları barədə məlumat vermişdir. Bildirmişdir ki, “Uludağ” Turizm və İstirahət Mərkəzi 2005-ci ildə İlisu kəndində 4 hektarlıq ərazidə inşa edilmişdir. İstirahət mərkəzi ilboyu turistlərin xidmətindədir. Burada istirahətçilər üçün hər cür şəraiti olan kottec tipli mənzillər vardır. “Uludağ”ın ən mühüm və fərqli cəhəti burada müalicə əhəmiyyətli vannaların olmasıdır. İlisu kəndindən 6 kilometr aralıda yerləşən Hamamçay dərəsindən istirahət mərkəzinə asma kəmərlərlə bir çox xəstəliklərin əlacı, möcüzəvi termal bulaqların suyu gətirilmiş və radon vannaları qurulmuşdur.
Tədbirdə mədəniyyət və turizm şöbəsinin müdiri Nəzir Omarov, rayonda fəaliyyət göstərən istirahət mərkəzlərinin rəhbərləri çıxış edərək “Turizm ili” çərçivəsində görüləcək işlərdən danışmışlar. Sonra tədbir iştirakçıları rayonun turizm potensialına aid sərgilərə baxmış, musiqi və rəqs kollektivlərinin çıxışlarını izləmişlər.
######
Bölmənin digər xəbərləri
