İmtiyazlı Sertifikatlaşdırılmış Mühasiblər Assosiasiyası ilə əməkdaşlığın gücləndirilməsi müzakirə olunub
Bakı, 29 may, AZƏRTAC
Auditorlar Palatası və İmtiyazlı Sertifikatlaşdırılmış Mühasiblər Assosiasiyasının (ACCA) nümayəndə heyətləri arasında əməkdaşlığın inkişafına dair görüş keçirilib.
Qurumdan AZƏRTAC-a verilən məlumata görə, Auditorlar Palatasında baş tutan işgüzar görüşdə icraçı direktor Səbuhi Gülməmmədov, sədrin müşaviri Fəqan Qarayev, sədrin elmi-metodik məsələlər üzrə müşaviri Nəcəf Talıbov, ACCA-nın Yaxın Şərq və Avrasiya üzrə rəhbəri Kush Ahuja və Avrasiya üzrə ictimai əlaqələr şöbəsinin rəhbəri Gaukhar Ashirbekova iştirak ediblər.
Görüşün əsas məqsədi 2024-cü ilin sentyabr ayında imzalanmış, yenilənmiş anlaşma memorandumunun icrası çərçivəsində görülmüş işlərin müzakirəsi, dayanıqlı inkişafa dair hesabatlılığın təmin edilməsi sahəsində beynəlxalq əməkdaşlığın gücləndirilməsi, Azərbaycanın Auditorlar Palatasının ACCA-nın qeydiyyatdan keçmiş təlim tərəfdaşı (Registered Learning Partner) kimi tanınması və digər məsələlərin müzakirəsindən ibarət olub.
Səbuhi Gülməmmədov Auditorlar Palatası tərəfindən son dövrlərdə peşənin təşkili və tənzimlənməsinə dair həyata keçirilmiş işlər, beynəlxalq təcrübənin öyrənilməsi və tətbiqi, o cümlədən 23 və 24 may tarixlərində keçirilmiş “ƏL/TMM sahəsində nəzarət orqanlarının rolu, vəzifələri və məsuliyyəti” mövzusunda beynəlxalq elmi-praktik konfrans, Peşəkar Mühasiblərin Beynəlxalq Etika Məcəlləsinin son versiyasının Azərbaycan dilinə tərcüməsi və nəşri, Pakistanın İmtiyazlı Mühasiblər İnstitutu ilə birgə nəşr etdirilmiş “İstixana qazlarının uçotunun əsasları-dayanıqlı inkişafla bağlı MHBS standartları əsasında” adlı təlimatın nəşri barədə məlumat verib və palatanın 2024-cü il üzrə fəaliyyətinin yekunlarında dair nəşr etdirilmiş hesabatını qonaqlara təqdim edib.
Daha sonra çıxış edən Fəqan Qarayev Auditorlar Palatası tərəfindən dayanıqlı inkişafa dair hesabatlılığın təkmilləşdirilməsi istiqamətində ACCA ilə əməkdaşlığın perspektivlərini vurğulayıb, Auditorlar Palatasının üzvləri üçün bu sahədə birgə ixtisasartırma kurslarının və sertifikasiyanın təşkili, Auditorlar Palatasının ACCA tərəfindən rəsmi təlim tərəfdaşı kimi tanınması məsələlərinin əməkdaşlığın prioritet istiqamətlərini təşkil etdiyini vurğulayıb.
ACCA-nın Yaxın Şərq və Avrasiya üzrə rəhbəri Kuş Ahuja və Avrasiya üzrə ictimai əlaqələr şöbəsinin rəhbəri Gaukhar Ashirbekova görüşə görə palatanın rəhbərliyinə öz minnətdarlıqlarını bildiriblər.
K.Ahuja Azərbaycanın Auditorlar Palatası tərəfindən görülən işləri yüksək qiymətləndirərək iki qurum arasında əməkdaşlıq çərçivəsində MHBS S1 və S2 Dayanıqlı İnkişaf Standartlarının və 5000 saylı Davamlılığın Təminatı üzrə Beynəlxalq Standartın tətbiqinə dair Palatanın üzvləri üçün ACCA-nın yeni dayanıqlı inkişafa dair sertifikatlaşdırma layihəsini birgə həyata keçirməyi təklif edib.
Daha sonra sədrin elmi-metodik məsələlər üzrə müşaviri Nəcəf Talıbov çıxışında dayanıqlı inkişafa dair hesabatlılığın təmin edilməsində auditorların rolundan bəhs edib.
Görüşün sonunda nümayəndə heyətləri gələcək əməkdaşlıq istiqamətləri üzrə geniş fikir mübadiləsi aparıb və prosesin davamlı inkişafı üçün qarşılıqlı fəaliyyət planlarının hazırlanmasına dair razılığa gəliblər.
Auditorlar Palatasının nümayəndə heyəti iki qurum arasında əməkdaşlığın inkişafına verdikləri dəstəyə görə Kuş Ahujaya və Gauxar Aşirbekovaya minnətdarlıqlarını bildiriblər.
Bölmənin digər xəbərləri
