İran ballistik raketləri modifikasiya edərək Rusiyaya vermək istəyir
Bakı, 13 dekabr, AZƏRTAC
İran Ukrayna ərazisinə zərbələr endirmək üçün Rusiyaya vermək istədiyi ballistik raketləri modifikasiya edərək, yəni mənzilini məhdudlaşdıraraq BMT Təhlükəsizlik Şurasının sanksiyalarından yayınmağa çalışır.
AZƏRTAC xəbər verir ki, Amerikanın “Axios” nəşri bu barədə İsrailin yüksəkvəzifəli dörd məmuruna, həmçinin kəşfiyyatın hesabatına istinadla məlumat yayıb.
“İranın Rusiyaya ballistik raket verməsi BMT Təhlükəsizlik Şurasının qətnaməsini poza və Tehrana qarşı sanksiyaların bərpası ilə nəticələnə bilər”, - deyə məlumatda bildirilir. Bu, həm İran, həm də BMT Təhlükəsizlik Şurasının daimi üzvü olan Rusiya üçün problemlər yarada bilər.
Eyni zamanda, dekabrın 3-də Rusiya müdafiə nazirinin müavini Aleksandr Fominin başçılıq etdiyi nümayəndə heyətinin Tehrana səfəri də diqqət mərkəzinə düşüb. İlkin məlumata görə, tərəflər hərbi sahədə əməkdaşlığı gücləndirmək barədə razılığa gəliblər. Vaşinqtonda bildiriblər ki, Tehran Moskvaya yüzlərlə ballistik raket satmaq, habelə kamikadze PUA-ları Rusiya ilə birgə istehsal etmək imkanlarını nəzərdən keçirir.
Qeyd edək ki, BMT Təhlükəsizlik Şurasının 2015-ci il tarixli 2231 saylı qətnaməsinə əsasən, heç bir ölkənin hərəkət radiusu 300 kilometrdən çox olan ballistik raketləri və PUA-ları İrana vermək və ya İrandan almaq hüququ yoxdur.
Bölmənin digər xəbərləri
