İşğal dövründə yararsız vəziyyətə düşən suvarma kanalı yenidən istifadəyə verilib
Bakı, 28 fevral, AZƏRTAC
Goranboy rayonunun Tapqaraqoyunlu kəndi ərazisində uzun illər düşmən nəzarəti altında olan torpaqların suvarılmasında yaranmış çətinliklər artıq arxada qalıb. Kənd sakinlərinin sözlərinə görə, 30 il ərzində mənfur düşmən onların əkin sahələrini atəş altında saxlayıb, neytral ərazidə yerləşən suvarma kanalını yararsız vəziyyətə salaraq, suyun sahələrə çatdırılmasına əngəl törədib. Ancaq Azərbaycan Ordusunun Şanlı Qələbəsindən sonra əkin sahələrinin suvarılması təmin edilib.
Azərbaycan Dövlət Su Ehtiyatları Agentliyindən (ADSEA) AZƏRTAC-a bildirilib ki, başlanğıcını İncəçaydan götürən, uzunluğu 7 kilometr olan Tap suvarma kanalı Goranboy Su Meliorasiya Sistemlərinin İstismarı İdarəsinin texnikaları vasitəsi ilə yenidən bərpa olunaraq lildən və kol-kosdan təmizlənib. Bununla da Tapqaraqoyunlu kəndinin 1500 hektar əkin sahəsinin suvarılması yaxşılaşıb.
Rayonda yerləşən əkin sahələrinin suvarılmasını mütəşəkkil aparmaq üçün 986 subartezian quyusu, 16 nasos stansiyası və ümumi uzunluğu 2277 kilometr olan suvarma kanalları istismar olunur. Bu qurğuların daimi saz vəziyyətdə qalması üçün il ərzində 1035 subartezian quyusunun nasosları cari təmir olunub, 46 ədəd təzə nasos alınaraq quyulara quraşdırılıb.
Bu il də rayonda bir sıra əsaslı və cari işlərin görülməsi planlaşdırılıb. Belə ki, rayonun ərazisində olan məhsuldarlığını tamamilə itirmiş 34 subartezian quyusunda aparılacaq əsaslı təmir işləri üçün layihə-smeta sənədləri hazırlanıb və işlərin görülməsinə başlanacaq. İstismar müddətini çoxdan başa vurmuş Səfikürd nasos stansiyasının I pilləsinin 1020 millimetrlik boru xəttinin nəzərdə tutulmuş 9 kilometrlik hissəsinin bu il 400 metrinin yenisi ilə əvəz olunması planlaşdırılır. Bütün bu işlərlə bərabər, idarə tərəfindən rayon ərazisində içməli su təminatının yaxşılaşdırılması üçün 11 kənddə yenidən içməli su xətti çəkilməsi, su anbarlarında və içməli su boru xətlərində təmir işlərinin görülməsi nəzərdə tutulub. Hazırda rayon ərazisində əhalinin dayanıqlı və fasiləsiz içməli su ilə təminatı həyata keçirilir.
Qeyd edək ki, Goranboy rayonunda və Murovdağ-Goranboy su kəmərinin ətrafında olan kəndlərdə abonentlərə içməli su 24 saat fasiləsiz verilir. Əvvəllər Veyisli kəndində və Yeni qəsəbədə içməli su günaşırı verilirdisə, hazırda gündəlik rejimə keçirilib. Qazanbulaq qəsəbəsi və Tapqaraqoyunlu kəndində də əhalinin tələbatına uyğun suyun verilməsi təmin edilir.
Bölmənin digər xəbərləri
