İSPANİYADA XOCALI SOYQIRIMI QURBANLARININ XATİRƏSİ YAD EDİLMİŞDİR
AZƏRTAC xəbər verir ki, Xocalı soyqırımının 16-cı ildönümü ilə əlaqədar fevralın 26-da Azərbaycanın İspaniya Krallığındakı səfirliyində Azərbaycan və türk diasporu nümayəndələrinin, yerli ictimaiyyətin təmsilçilərinin iştirakı ilə anma mərasimi keçirilmişdir.
Səfirlikdən verilən məlumatda bildirilir ki, Xocalı soyqırımı qurbanlarının xatirəsinin bir dəqiqəlik sükutla yad edilməsindən sonra səfir Məmməd Əliyev 1992-ci ilin fevralında erməni millətçilərinin Xocalıda törətdikləri vəhşiliklər haqqında ətraflı məlumat vermiş, bu faciənin Azərbaycan xalqının yaddaşından heç vaxt silinməyəcəyini vurğulamışdır.
Diplomat xüsusi qeyd etmişdir ki, yalnız Azərbaycan xalqının ümummilli lideri Heydər Əliyevin yenidən siyasi rəhbərliyə qayıtmasından sonra erməni cəlladlarının xalqımıza qarşı törətdikləri dəhşətli cinayətlər, o cümlədən Xocalı soyqırımı barədə həqiqətlər dünya dövlətlərinə, beynəlxalq ictimaiyyətin nəzərinə çatdırıldı. Bu cinayətə hüquqi qiymət verilməsinin zəruri olması barədə qətiyyətli tələblər səsləndi. Bu gün Azərbaycan Prezidenti İlham Əliyev bu xətti əzmlə davam etdirir.
Toplantı iştirakçıları erməni cəladdlarının azərbaycanlılara qarşı amansızcasına törətdikləri bu vəhşilikləri qəti şəkildə pisləmişlər.
Xocalı soyqırımı həqiqətlərinin İspaniya ictimaiyyətinin diqqətinə çatdırılması məqsədilə bu ölkənin nüfuzlu “El Pais”, “El Mundo”, “La Razon” və “ABC” qəzetlərinin müxbirləri toplantıya dəvət olunmuşdular.
Tədbirin sonunda Xocalı soyqırımına dair fotostend və film nümayiş etdirilmişdir.
Bölmənin digər xəbərləri
