İsrail İsa Peyğəmbərin xaç suyuna çəkildiyi yeri sərbəst ziyarət etmək imkanı yaratmışdır
Bakı, 14 iyul (AZƏRTAC). İsrailin hakimiyyət orqanları dünya xristianları üçün müqəddəs sayılan İordan çayının Qəsr əl-Yahud deyilən yerinin turistlər və zəvvarlar tərəfindən sərbəst ziyarət edilməsinə imkan yaratmışdır. İncilə görə, burada İsa Peyğəmbər xaç suyuna çəkilmişdir. Bu yerləri ziyarət etmək üçün daha xüsusi icazə və hərbi idarələrlə razılaşdırma tələb olunmayacaqdır.
İsrailin turizm nazirinin müşaviri Amnon Liberman demişdir: “Bu gündən etibarən turizm mərkəzi arzu edənlər üçün ilboyu açıq olacaqdır. Bu qərar 10-dan çox razılaşmanın və ardı kəsilməyən əlaqələndirmə işinin nəticəsi olmuşdur. Ümidvarıq ki, bu fakt İsrailə turist axınını xeyli gücləndirəcəkdir”.
Onun sözlərinə görə, müvafiq xidmətlər turizm mərkəzi rayonunda ildə bir neçə dəfə su nümunəsi götürürlər. Ötənilki analizin qeyri-qənaətbəxş olması İsrail Turizm Nazirliyi ilə müstəqil ekoloqlar arasında münaqişə yaratmışdır. Göstəricilərin sanitariya normalarına uyğun gəlmədiyini iddia edən ekoloqlar İordan çayının aşağı axınındakı sahənin dindarlar üçün bağlanmasını tələb etmişlər.
Fələstinin İyerixon şəhəri yaxınlığında yerləşən Qəsr əl-Yahudu hər il 100 mindən çox turist və zəvvar ziyarət edir. İordan sahillərinin bu hissəsi 1967-ci il müharibəsindən sonra hərbi zona elan edildiyi üçün ilin xeyli hissəsində bura gəlməyə icazə verilmirdi. Xristianların, xüsusən pravoslav konfessiyalarının nümayəndələrinin inancına görə, İordanın aşağı axınında - onun sularının Ölü dənizə töküldüyü yerin yaxınlığında İsa Peyğəmbər Yəhya Peyğəmbər tərəfindən xaç suyuna çəkilmişdir.
Bölmənin digər xəbərləri
