İsraildə Xocalı soyqırımına həsr olunmuş fotosərgi açılmışdır
Bakı, 27 fevral (AZƏRTAC). Xocalı soyqırımının 20 illiyi ilə əlaqədar dünyanın əksər ölkələrində olduğu kimi, İsraildə də anma mərasimi keçirilir.
AZƏRTAC xəbər verir ki, fevralın 27-də İsraildə Xocalı soyqırımı qurbanlarının xatirə gününə həsr edilmiş “İsrail-Azərbaycan: strateji ittifaq” adlı elmi-praktiki konfrans keçirilmişdir.
“İsrail-Azərbaycan” Beynəlxalq Assosiasiyasının Netanya Akademik Kollecinin Strateji Dialoq üzrə S.Daniel Abraham Mərkəzi ilə birgə təşkil etdiyi konfrans çərçivəsində Azərbaycan Dövlət Teleqraf Agentliyinin (AZƏRTAC-ın) təşkilatçılığı və dəstəyi ilə Xocalı soyqırımına həsr olunmuş fotosərgi açılmışdır.
Sərgidə Heydər Əliyev Fondunun hazırladığı kitablar, foto, videomateriallar, eləcə də Azərbaycan Prezidenti Administrasiyasının və AZƏRTAC-ın birgə layihəsi əsasında Azərbaycan, ingilis, rus, fransız, alman və ərəb dillərində hazırlanmış “Xocalı. XX əsrin soyqırımı” kitabı, Azərbaycan Respublikası Diasporla İş üzrə Dövlət Komitəsinin hazırladığı broşürlər, audio-videomateriallar nümayiş etdirilir.
Tədbir iştirakçıları Xocalı faciəsini, erməni vəhşiliklərini göz önünə gətirən sərgi ilə tanış olmuşlar.
Bütün dünyada yayılan bu tarixi materiallar erməni vəhşiliyinin iç üzünü bir daha göstərmişdir.
Sərgidə nümayiş olunan materiallarda ermənilərin qadın, uşaq və qocalara qarşı amansızlığı, Qarabağın qanlı-qadalı illərində yer üzündən silinən bir şəhərin faciəsi əksini tapmışdır. Xocalı faciəsi iki yüz ilə yaxın bir müddətdə erməni faşistləri tərəfindən azərbaycanlılara qarşı müntəzəm olaraq həyata keçirilən etnik təmizləmə və soyqırımı siyasətinin davamı və ən qanlı səhifəsidir. Bu materiallar miqyasına və dəhşətlərinə görə dünya tarixində nadir faciələrdən olan Xocalıda baş verənləri tarixi sübutlarla diqqətə çatdırır.
Sərginin izləyənlər arasında İsrail Knessetinin və Azərbaycan Respublikasının Milli Məclisinin deputatları, elm adamları, araşdırma mərkəzlərinin nümayəndələri, politoloqlar, Xarici İşlər Nazirliyinin nümayəndələri və İsraildə fəaliyyət göstərən diplomatik nümayəndəliklərin rəhbərləri də vardır.
Onlar Xocalı soyqırımı ilə bağlı fikirlərini bölüşmüş, bu dəhşətli faciəni törədənlərin tezliklə ədalət məhkəməsi qarşısında cavab vermələrinin vacibliyini söyləmişlər.
Bölmənin digər xəbərləri
