İtaliyada, Litvada və Gürcüstanda Xocalı faciəsi ilə bağlı aksiyalar keçirilmişdir
Bakı, 27 fevral (AZƏRTAC). Dialoq və Əməkdaşlıq uğrunda İslam Konfransı Gənclər Forumundan (DƏ-İKGF) AZƏRTAC-a bildirmişlər ki, “Xocalıya ədalət” beynəlxalq təbliğat və məlumatlandırma kampaniyası çərçivəsində fevralın 26-da Romada Azərbaycan-İtaliya Gənclər Assosiasiyası (AİGA) tərəfindən Xocalı soyqırımının 22-ci ildönümü ilə əlaqədar aksiya keçirilmişdir.
Azərbaycanın İtaliyadakı səfirliyinin dəstəyi ilə təşkil edilmiş tədbirin məqsədi Ermənistan-Azərbaycan, Dağlıq Qarabağ münaqişəsi, o cümlədən Xocalı soyqırımı ilə bağlı həqiqətləri İtaliya ictimaiyyətinə çatdırmaq olmuşdur. Romanın Spagna meydanında keçirilən aksiyada yerli sakinlərə və turistlərə Xocalı soyqırımı haqqında ətraflı məlumat verilmişdir. Tədbir çərçivəsində, həmçinin AİGA-nın fəalları, azərbaycanlı tələbələr və Romada yaşayan soydaşlarımız tərəfindən Xocalı soyqırımı ilə bağlı məlumatları əks etdirən bukletlər paylanmışdır.
Fevralın 25-də Litvanın Klaypeda şəhərində “Azəris“ Cəmiyyətinin təşkilatçılığı ilə “Xocalıya Ədalət” kampaniyası çərçivəsində “dəyirmi masa” keçirilmişdir. Media nümayəndələri ilə yanaşı, şəhərin yəhudi cəmiyyətinin sədri Feleks Puzimski, Klaypeda dairəsi müsəlman təşkilatının sədri Şamil Gumerov, Tatar cəmiyyətinin sədri İlfir Gibadullin, Ukrayna cəmiyyətinin sədri Leonid Trequb, Belarus cəmiyyətinin sədri Nikolay Loqvin “dəyirmi masa”da iştirak etmişlər.
Tədbirin əsas təşkilatçılarından olan Rəna Məmmədova, “Azəris“ Cəmiyyətinin sədri Əlağa Məmmədov Azərbaycan həqiqətlərinin Litvada yaşayan digər millətlərə daha ətraflı çatdırılmasında səylərini əsirgəməyəcəklərini bildirmişlər. Qarabağ hadisələrinin şahidi olan, Litvada təhsil alan Sevinc Məhərrəmova yaxınlarının başına gətirilən müsibətlərdən söz açmışdır.
Sonra tədbirdə Xocalı həqiqətlərini əks etdirən videoçarx nümayiş olunmuşdur.
Fevralın 26-da isə Litvanın Kaunas şəhərində təhsil alan azərbaycanlı tələbələr tərəfindən “Xocalıya ədalət” adlı aksiya keçirilmişdir. Aksiyada tələbələr Xocalı soyqırımı faktlarını özündə əks etdirən Litva və ingilis dillərində çap olunmuş broşürləri və qolbaqları ictimaiyyətin nümayəndələrinə, xarici və yerli tələbələrə paylamışlar. Ümumilikdə aksiyada 300-ə yaxın insan soyqırımı haqqında məlumatlandırılmışdır.
Fevralın 26-da kampaniya çərçivəsində Gürcüstan Azərbaycanlılarının Mədəniyyət Mərkəzinin gənclər şöbəsi tərəfindən Tiflisdə “Geo Visions” təşkilatının ofisində Xocalı soyqırımına həsr olunmuş tədbir keçirilmişdir.
Tədbirdə iştirak edən gürcü və azərbaycanlı gənclərə faciə haqqında ətraflı məlumat verilmiş, “Xocalı soyqırımı” sənədli filmi nümayiş olunmuşdur.
Həmin gün Tiflisin mərkəzi küçələrində yürüş təşkil edilmiş, yerli sakinlərə və şəhərin xarici qonaqlarına informasiya bukletləri paylanmışdır. Aksiyalar, eyni zamanda, Gürcüstanın digər bölgələrində, əsasən gürcülərin yaşadıqları şəhər və kəndlərdə davam etdirilmişdir.
“Xocalıya ədalət” beynəlxalq təbliğat və məlumatlandırma kampaniyasının yaradılması təşəbbüsü 2008-ci il mayın 8-də, Şuşanın işğalının ildönümü günü Dialoq və Əməkdaşlıq Uğrunda İslam Konfransı Gənclər Forumunun mədəniyyətlərarası dialoq üzrə baş əlaqələndiricisi, Heydər Əliyev Fondunun vitse-prezidenti Leyla Əliyeva tərəfindən irəli sürülmüşdür. Faciənin mənəvi, siyasi və hüquqi müstəvidə tanınmasına yönələn bu kampaniya hazırda dünyanın 40-dan çox ölkəsində uğurla həyata keçirilməkdədir.
Bölmənin digər xəbərləri
