İtaliyanın Azərbaycandakı sabiq səfiri Marqarita Kosta: Heydər Əliyev şəxsən tanıdığım fenomenal insan idi
Roma, 12 noyabr, AZƏRTAC
Heydər Əliyev mənim üçün ən fenomenal insan anlamını ifadə edir. Cəsarət, həssaslıq, intellekt, qayğıkeşlik, xeyirxahlıq, yumor hissi, xüsusilə də siyasi uzaqgörənlik... Heydər Əliyev bütün bu keyfiyyətlərə malik şəxsiyyət idi.
Bu fikirləri AZƏRTAC-a müsahibəsində İtaliyanın Azərbaycandakı sabiq səfiri, qərargahı Genuya şəhərində yerləşən Liquriya, Pyemont, Valle d’Aostra və Lombardiya regionlarında Azərbaycanın fəxri konsulu Marqarita Kosta söyləyib.
O qeyd edib ki, Bakı-Tbilisi-Ceyhan və Bakı-Tbilisi-Ərzurum neft-qaz kəmərləri Heydər Əliyevin siyasi uzaqgörənliyi və müəllifi olduğu “Əsrin müqaviləsi” çərçivəsində həyata keçirilən ən mühüm layihələr olmaqla, Azərbaycan neftini və qazını istehsal və ixrac etməyə imkan yaradıb. Bu fenomenal şəxsiyyət Azərbaycan-İtaliya münasibətlərinin qurulmasında və inkişafında böyük rol oynayıb.
“Vatikan ilə Azərbaycanın diplomatik əlaqələrinin qurulmasının 10 illiyində - 2002-ci ildə Heydər Əliyevin dəvəti ilə Roma Papası II İohann Pavelin Bakıya səfəri bütün dünyaya Azərbaycanda tolerantlığın, müxtəlif dinlərə hörmətin hansı səviyyədə olduğunu göstərən hadisələrdən biri idi. Mənim üçün “hörmət” ən dəyərli sözdür. Çünki hörmət qarşılıqlılığı ehtiva edir və düşünürəm ki, hörmət olmadan heç nə etmək mümkün deyil. Bu, eyni zamanda, Bakıdakı erməni kilsəsini heç kimin vandalizmə məruz qoymaq niyyətinin olmamasında da özünü göstərir.
Roma Papası İtaliyaya Azərbaycandan bir imam, bir pravoslav keşiş, bir katolik keşiş və bir ravvin dəvət etmişdi. Onlar Roma və Venesiyaya səfərləri zamanı buradan möhtəşəm təəssüratlarla ayrıldıqlarını danışırdılar”, - deyə İtaliyanın Azərbaycandakı sabiq səfiri vurğulayıb.
Marqarita Kosta Heydər Əliyevlə bağlı xatirələrindən danışarkən deyib: “Onunla bağlı daha bir xoş xatirəm də var. Heydər Əliyev italyan skripkaçı və bəstəkar Nikkolo Paqaninin skripkasını Bakiya gətirtmişdi və bu skripka 16 yaşlı gəncə hədiyyə edilmişdi. Bu da möhtəşəm hadisə olmaqla, Heydər Əliyevin və Azərbaycan xalqının musiqiyə, istedadlı gənclərə diqqətinin bariz nümunəsidir.
Lakin ən çox xatırladığım məqam Heydər Əliyevin yumor hissidir. Böyük bir tədbir münasibətilə Prezident Heydər Əliyev çoxlu qonaqlarla birlikdə, həm də səfirləri qəbul edirdi. Növbə mənə çatanda gülümsəyərək dedi: “Marqarita xanım, hər dəfə sizi görəndə ürəyimdən sizi qucaqlamaq keçir”. Mən soruşdum: “Bəs niyə qucaqlamırsınız? Bunu edə bilərsiniz”. O dedi: “Televiziyanın qarşısında?” Mən dedim: “Əlbəttə”. Heydər Əliyev məni qucaqladı və mən ona dedim: “İndi məni çıxılmaz vəziyyətdə qoydunuz, axı mən tək deyiləm, burada daha üç xanım səfir var. Qısqanmasınlar deyə Siz gərək onları da qucaqlayasınız”. Heydər Əliyev xanım səfirlərin hamısını qucaqladı və dedi: “İstərdim ki, bütün səfirlər xanım olsun. Beləliklə bütün dünyanı qucaqlamış olardım”.
Bütün bunlar Heydər Əliyevin həssaslığının, intellektinin və cəsarətinin nümayişidir. Mənim üçün o, unudulmaz insandır”.
İtaliyanın Azərbaycandakı sabiq səfiri söhbətinə davam edərək deyib ki, Azərbaycanda ölüm hökmü Heydər Əliyevin hakimiyyəti dövründə ləğv edildi. Bu da xatırlamalı olduğumuz və “əhsən” deməli olduğumuz məqamlardandır.
“1923-cü ildə Naxçıvanda dünyaya göz açan Heydər Əliyevin xüsusiyyətləri bayrağa sədaqət, işə münasibətdə fədakarlıq və əxlaqi dürüstlükdür. O, həmin xüsusiyyətləri oğluna - Azərbaycan Prezidenti İlham Əliyevə və təbii ki, mənim üçün dünyanın ən möhtəşəm xanımlarından biri, çox sevdiyim və hörmət bəslədiyim Mehriban xanım Əliyevaya da ötürüb”, - deyə Marqarita Kosta vurğulayıb.
Nihad Budaqov
AZƏRTAC-ın xüsusi müxbiri
Roma
Bölmənin digər xəbərləri
