Kahramanmaraşdakı “Azərbaycan” məhəlləsi hər bir türkün qəlbində iftixar və qürur hissi doğurur ŞƏRH
Bakı, 23 iyun, AZƏRTAC
Türkiyənin Kahramanmaraş şəhərində “Azərbaycan” məhəlləsinin təntənəli açılışı hər bir azərbaycanlının və türkün qəlbində iftixar və qürur hissi doğurur. 2023-cü ilin fevralında baş verən dəhşətli zəlzələdən dərhal sonra Azərbaycanın göstərdiyi qardaş dəstəyi bu gün real bir yaşayış məkanına çevrilərək tarixə yazıldı. Mən də fəlakətin ilk günlərində bir sıra həmkarlarımla birlikdə Kahramanmaraşda olmuş, zəlzələnin ağır nəticələrini yerində görmüş və xalqımız adından başsağlığı vermişdim. O zaman insanların yaşadığı dərdləri, itkiləri, acıları birbaşa görərək, bu xalqın necə böyük iradəyə sahib olduğuna bir daha şahidlik etmişəm.
Bu fikirləri AZƏRTAC-a açıqlamasında Milli Məclisin deputatı Fatma Yıldırım deyib.
Onun sözlərinə görə, bu gün həmin bölgədə “Azərbaycan” məhəlləsi kimi bir layihənin reallığa çevrilməsi, Prezident İlham Əliyevin və Prezident Rəcəb Tayyib Ərdoğanın iştirakı ilə açılışın gerçəkləşməsi bir daha sübut edir ki, Azərbaycan-Türkiyə münasibətləri, sadəcə, diplomatik müstəvi ilə məhdudlaşmır – bu münasibətlər qardaşlıq, mənəviyyat və həmrəylik üzərində qurulub.
Azərbaycan Respublikasının Mənzil İnşaatı Dövlət Agentliyi tərəfindən həyata keçirilən bu layihə bir yaşayış məntəqəsindən daha artıq anlam daşıyır – bu, dostluğun, mərhəmətin və bir millətin digər millətə dayaq olmasının simvoludur.
Deputat qeyd edib ki, “Azərbaycan” məhəlləsində yalnız evlər deyil, eyni zamanda, mədəniyyət mərkəzləri, ticarət obyektləri də inşa olunub. Bu, bizim niyyətimizin təkcə zəruri yaşayış deyil, həm də layiqli və xoş bir həyat təmin etmək olduğunu göstərir.
“Prezident İlham Əliyevin açılışda səsləndirdiyi fikirlər, – “biz yaxşı günlərdə də, ağır günlərdə də daim bir-birimizin yanındayıq”, – əslində, bu tarixi münasibətlərin mahiyyətini qısa və çox dolğun şəkildə ifadə edir. Azərbaycan və Türkiyə bir millət, iki dövlətdir. Bu layihə bir daha göstərdi ki, biz eyni ağrını bölüşür, eyni ümidlərlə birgə addımlayırıq. Əminəm ki, bu qardaşlıq daha da möhkəmlənəcək və gələcək nəsillərə örnək olacaq”, - deyə Fatma Yıldırım vurğulayıb.
Bölmənin digər xəbərləri
