KƏNAN PİRİZADƏ VƏ SERGEY PLUJNİKOV ÜZGÜÇÜLÜK ÜZRƏ AVROPA ÇEMPİONATINDA İŞTİRAK EDƏCƏKLƏR
Bakı, 22 sentyabr (AZƏRTAC). Oktyabrın 18-dən 24-dək İslandiyanın paytaxtı Reykyavikdə əlillər arasında üzgüçülük üzrə Avropa çempionatı keçiriləcəkdir. Dünyanın 37 ölkəsindən 650 idmançı iştirak edəcəyi yarışmada Azərbaycanı Kənan Pirizadə və Sergey Plujnikov təmsil edəcəklər. İslandiyaya idmançılarımızla birlikdə yığma komandamızın baş məşqçisi Allahverdi Culfayev və məşqçi Andrey Plujnikov da gedəcəklər.
İdmançılarımız məsul yarışlara hazırlaşmaq məqdəsilə sentyabrın 19-dan təlim-məşq toplantısına qatılmışlar. Təlim-məşq toplantısı 20 gün davam edəcəkdir.
Beynəlxalq Paralimpiya Komitəsi (BPK) artıq Avropa çempionatının keçiriləcəyi yerləri yoxlamışdır. BPK-nin üzgüçülük üzrə meneceri Aqnes Jilvak Təşkilat Komitəsinin üzvləri ilə görüşmüşdür. Görüşdə, həmçinin İslandiya Milli Paralimpiya Komitəsinin, Üzgüçülük Üzrə Federasiyanın və Milli Antidopinq Təşkilatının üzvləri iştirak etmişlər. Yarışların keçiriləcəyi yerləri və idmançıların qalacaqları binaları nəzərdən keçirən Aqnes Jilvak demişdir: “Biz Təşkilat Komitəsinin İslandiya paytaxtında gördüyü işlərdən razıyıq və səbirsizliklə qarşıdakı çempionatı gözləyirik”.
Bölmənin digər xəbərləri
