Kənan Qasımov: 200-dən çox mehmanxana monitorinqə cəlb olunub
Bakı, 4 sentyabr, AZƏRTAC
Son iki həftə ərzində keçirilən monitorinqlərdə paytaxtda və regionlarda yerləşən 229 mehmanxana monitorinqə cəlb olunub və bu proses hazırda davam edir.
AZƏRTAC xəbər verir ki, bu sözləri Dövlət Turizm Agentliyinin Aparat rəhbəri Kənan Qasımov “Park İnn” hotelində keçirilən monitorinq zamanı deyib.
Onun sözlərinə görə, keçirilən monitorinqlər zamanı onlayn qaydada mehmanxanalarda məlutlandırma sessiyaları keçirilib və qaydalar ətraflı izah edilib. Bundan əlavə mehmanxanalarda könüllülər fəaliyyət göstərir ki, onlar da bu prosesi izləyir və yaranan suallara cavab verməkdə yardımçı olurlar.
“Mehmanxanalarda idman zalları, hovuzlar və digər alternativ xidmət vasitələri vardır ki, onların fəaliyyəti də qaydalarda öz əksini tapıb. Qaydalara əsasən bu xidmət vasitələrindən yalnız mehmanxananın qonaqları istifadə edə bilər, kənardan gələn şəxslər belə məkanlara buraxılmır. Mehmanxanalar da həmin qaydalara uyğun olaraq öz işlərini qururlar”, deyə o, əlavə edib.
Bildirib ki, monitorinqlərə başlanan gündən etibarən böyük irəliləyişlərə nail olunub. Bu gün ölkədəki mehmanxanaların əksəriyyəti öz işlərini mövcud qaydalara uyğun qururlar. Regionlara gediş-gəlişə icazə verilsə turizm müəssisələri qonaqları qəbul etməyə tam hazırdır.
Bölmənin digər xəbərləri
