KƏND TƏSƏRRÜFATI İŞLƏRİNƏ KREDİT AYRILMASI NƏZƏRDƏ TUTULUR
Kənd Təsərrüfatı Nazirliyindən AZƏRTAC-a bildirmişlər ki, FİNSA-AZƏRBAYCAN LLS qeyri-bank təşkilatı ABŞ-ın Beynəlxalq İnkişaf Agentliyinin köməyi və dəstəyi ilə 2003-cü ilin fevralından ölkəmizdə kənd təsərrüfatı işlərinə kiçik kreditlər ayırmaq fikrindədir.
Bu təşkilat ölkəmizin müxtəlif bölgələrinin fermer təşkilatları ilə əlaqə yaratmışdır. Kənd təsərrüfatı işlərinin kreditləşdirilməsi iki mərhələdə aparılacaqdır. Birinci mərhələdə kollektiv borc alanlara 1000 dollar veriləcəkdir. Sonra qrupun hər bir iştirakçısı, krediti vaxtında qaytarmaq şərti ilə, 1000 dollara qədər məbləğdə ayrıca kredit ala bilər.
Layihənin təşkilatçılarının niyyətinə görə, Azərbaycan fermerlərinə veriləcək bu kreditlər toxum, gübrə və yem alınmasına, habelə kənd təsərrüfatı texnikasının təmirinə sərf olunmalıdır. Kreditin aylıq faiz dərəcəsi 4-5 faiz veriləcəkdir.
Xatırladaq ki, bu, FİNSA-AZƏRBAYCAN LLS-in respublikamızda həyata keçirdiyi birinci layihə deyil. Təşkilat bu yaxınlarda kiçik ticarət obyektlərini də kreditləşdirmişdir. Hazırda onun kredit portfeli təxminən 500 min dollardır.
Bölmənin digər xəbərləri
