“Kəpəz” “Neftçi”ni Bakıda məğlub edib
Bakı, 20 mart, Elşad Qəzvini, AZƏRTAC
Futbol üzrə Azərbaycan Premyer Liqasında XXVI turun görüşləri davam edir.
AZƏRTAC xəbər verir ki, günün son görüşü “Bakcell Arena”da oynanılıb. “Neftçi” Gəncənin “Kəpəz” komandası ilə qarşılaşıb. 30-cu dəqiqədə Bəxtiyar Soltanov qonaqların ilk qolunun müəllifi olub. Üç dəqiqə sonra Tural Axundov penaltini dəqiq yerinə yetirib. İkinci hissəyə fəal başlayan meydan sahibləri 60-cı dəqiqədə Araz Abdullayevin, 81-ci dəqiqədə isə penaltidən Ruslan Qurbanovun vurduğu qollarla hesabı bərabərləşdirib. Lakin əsas vaxtın bitməsinə bir dəqiqə qalmiş Şəhriyar Rəhimovun qolu ilə hesabda önə çıxan “Kəpəz” oyunu qələbə ilə başa vurub - 3:2.
Beləliklə, xalını 42-yə çatdıran Şahin Diniyevin komandası turnir cədvəlində üçüncü pilləyə yüksəlib. “Neftçi” isə 32 xalla yeddinci pillədə qalıb.
Sabah tura “Xəzər Lənkəran” - “İnter” və “Zirə” - AZAL görüşləri ilə yekun vurulacaq.
Bölmənin digər xəbərləri
