Kimyaçılar Sumqayıtdakı Şəhidlər xiyabanını və şəhərin mikrorayonlarındakı şəhid xatirə komplekslərini ziyarət etmişlər
Sumqayıt, 21 yanvar (AZƏRTAC). “Azərikimya” İstehsalat Birliyinin kollektivi Vətən şəhidlərinin xatirəsinə Sumqayıtın 9-cu, 10-cu və 12-ci mikrorayonlarında yaradılmış xatirə komplekslərini ziyarət etmişlər.
Kimyaçılar Vətən torpaqlarının müdafiəsi uğrunda həlak olmuş şəhidlərimizin xatirəsini ehtiramla yad edərək abidələrin qarşısına gül dəstələri düzmüşlər. Birliyin Müşahidə Şurasının sədri, Milli Məclisin deputatı Muxtar Babayev şəhidlərin valideynləri ilə görüşmüş, onların problem və qayğıları ilə maraqlanmışdır. Şəhidlərin xatirələrinin hər zaman ehtiramla yad edilməsi, böyüməkdə olan gənc nəsil üçün şəhid komplekslərinin daimi ziyarətgaha çevrilməsi üçün yaxın vaxtlarda həmin komplekslərin daha da abadlaşdırılması, axşamlar işıqlandırılması, bulaq çəkilməsi və s. tədbirlərin görülməsi qərara alınmışdır.
Sonra kimyaçılar 10-cu mikrorayonda yerləşən, Sumqayıtın ən qabaqcıl təhsil ocaqlarından sayılan 24 nömrəli məktəbdə olmuş, bu məktəbin Qarabağ döyüşlərində həlak olmuş məzunlarının xatirə kompleksini müəllim-şagird kollektivi ilə birgə ziyarət edərək, onların mərmər lövhələrdəki şəkilləri önünə qərənfil dəstələri qoymuşlar. Vətənin qeyrətli, mərd və mübariz oğulları olan şəhidlərin müqəddəs ruhuna dualar oxunmuşdur.
Kimyaçılar məktəbin akt zalında 20 Yanvar şəhidlərinin xatirəsinə həsr olunmuş geniş tədbirdə də iştirak etmişlər. Məktəblilərin ifasında şəhidlərimizə həsr olunmuş, mübarizə və qələbəyə səsləyən şeirlər və mahnılar səsləndirilmişdir.
Məktəbin direktoru Mehriban Nəcəfovanın, “Azərikimya” İstehsalat Birliyinin Müşahidə Şurasının sədri Muxtar Babayevin, Sumqayıt Şəhər Təhsil Şöbəsinin müdiri Mahal Əliyevin və başqalarının çıxışlarında Azərbaycan Prezidenti, Ali Baş Komandan İlham Əliyevin rəhbərliyi altında Vətən torpaqlarının tezliklə düşməndən azad olunacağına və ölkəmizin sürətlə inkişaf edərək, daha böyük sosial-iqtisadi nailiyyətlər əldə edəcəyinə əminlik ifadə olunmuşdur.
“Azərikimya” İstehsalat Birliyinin müəssisə və idarələrinin 500 nəfərdən artıq böyük bir qrupu Sumqayıtın Şəhidlər xiyabanına gedərək, ölkəmizin azadlıq və istiqlaliyyəti uğrunda döyüşlərdə mərd mübarizlər kimi həlak olmuş Vətən şəhidlərinin xatirəsini ehtiramla yad etmişlər. Vətənin minlərlə müdafiəçiləri kimi igidliklə vuruşmuş cəsur Sumqayıt döyüşçüləri sırasında yüzlərlə kimyaçı gənc də 1990-cı ilin müdhiş yanvar günlərində Sovet imperiyasının güclü hərb maşınına mərdliklə sinə gərmiş, Qarabağ uğrunda döyüşlərdə fədakarlıqla vuruşmuş, düşmənə qarşı amansız mübarizə aparmışdır.
Kimyaçılar şəhər sakinlərinin ziyarətgahına çevrilmiş Şəhidlər xiyabanında uyuyan bütün Sumqayıt şəhidlərinin, həmçinin keçmiş iş yoldaşlarının xatirəsini yad edərək, onların məzarları üstünə tər gül dəstələri düzmüş, ruhlarına dualar oxumuşlar.
Bölmənin digər xəbərləri
