KİYEVDƏ AVTOMOBİL SAHİBLƏRİNƏ QARŞI TƏLƏBLƏR ŞƏRTLƏŞDİRİLİR
AZƏRTAC-ın xüsusi müxbiri xəbər verir ki, indən belə kiyevlilər piyadalara, ictimai nəqliyyata mane olan, yaxud yol tıxaclarına gətirib çıxaran qanunsuz yerdə saxlanılan maşınlardan xüsusi telefonla şikayət edə bilərlər. Qazonlarda və digər yaşıllıq sahələrində saxlanılmış maşınlar barədə də məlumat vermək olar. Bunun üçün meriyanın çoxkabelli fasiləsiz telefonunun nömrəsini yığmaq kifayətdir.
Kiyev Şəhər hökumət bununla yollarda yaranmış vəziyyəti, az da olsa, qaydaya salmaq niyyətindədir. Telefon zəngindən 20 dəqiqə sonra yol hərəkətinə əngəl törədən avtomobil cərimə meydançasına göndəriləcəkdir. Sahibi maşını geri qaytarmaq üçün avtomobilinin markasından və mühərrikin həcmindən asılı olaraq 100-1000 qrivna (20-200 ABŞ dolları) ödəməli olacaqdır.
