Hədəflər üçün çalışmağın özü belə yeni təcrübələr və fürsətlər qazandıran bir prosesdir

Bakı, 15 avqust, Gülay Nəzərova, AZƏRTAC

Azərbaycan Prezidenti İlham Əliyevin rəhbərliyi ilə ölkəmizdə bütün sahələrdə olduğu kimi uğurlu gənclər siyasəti də öz bəhrəsini verir. Bu siyasətin nəticəsidir ki, Azərbaycan gəncləri öz bilik, bacarıq və istedadları ilə dünyaya səs salıb. Hazırda onlar harada olmalarından asılı olmayaraq öz inkişaflarını təmin etməklə yanaşı, həm də dövlətimizin mənafeyini etibarlı şəkildə müdafiə edir, Azərbaycanın adını hər yerdə yüksəklərə qaldırırlar. Bir sözlə bu gün hər bir gənc öz yolunu müstəqil Azərbaycan Respublikasının həyat yolu kimi qəbul edir.

Sevindirici haldır ki, belə Azərbaycan gənclərin sayı ildən-ilə artır, onların sorağı dünyanın dörd bir yanından gəlir. Onların qazandığı uğur təkcə ailələrini, yaxınlarını deyil, bütövlükdə hamımızı sevindirir və qürurlandırır. Belə gənclərdən biri də dünyanın ən nüfuzlu ali təhsil ocaqlarında olan, ABŞ-ın Nyu-York şəhərində yerləşən Kolumbiya Universitetinə qəbul olan Dəniz Məmmədzadədir. Azərbaycanın dilbər guşələrindən olan Şəkidə dünyaya göz açan Dəniz hazırda ABŞ-a getməyə hazırlaşır.

Dəniz Məmmədzadə ilə həmsöhbət olan AZƏRTAC-ın müxbiri onun qazandığı uğurları oxucularla bölüşür.

Dəniz təhsilinə Şəki Şəhər 5 nömrəli tam orta məktəbdə başlayıb. Sonra 2019-cu ildən, yəni, 7-ci sinifdən etibarən Şəki şəhər Kimya-biologiya təmayüllü liseydə təhsilini davam etdirib. O, elə həmin liseydən bu il məzun olub. Dəniz, həmçinin BMT-nin gənclərdən ibarət Məşvərət Şurasında 17 üzvdən biridir. Hazırda isə gələcəyinə işıq tutacaq Kolumbiya Universitetində təhsilinə başlamaq üçün əmin addımlarla irəliləyir.

Dəniz bildirib ki, universitetə hazırlıq müddətində liseydə müəllimləri və dostları ona həmişə dəstək olub: “Liseydə təhsil almağa başladığım müddətdən riyaziyyat fənni ilə məşğul oluram. 2022-ci ildə respublika fənn olimpiadalarında riyaziyyat üzrə bürünc medal, “American Mathematics” Olimpiadasında qızıl medal, Frankfurt şəhərində keçirilən “International STEM” Olimpiadasında qızıl medal, Böyük Qafqaz İncəsənət Kubokunda 1-ci yeri qazanmışam. Bundan əlavə, musiqi ilə məşğul oluram. Yeddi illik piano təhsilim var. Bu müddət ərzində müxtəlif müsabiqə və konsertlərdə iştirak etmişəm. 2021-ci ildə keçirilən Gənc Musiqiçilərin Beynəlxalq Müsabiqəsində diplomant adına layiq görülmüşəm. Eyni zamanda, səkkizinci sinifdən bəri intellektual oyunlarla məşğul oluram. Həmin müddətdən məktəbimizin yığma komandası ilə müxtəlif regional və respublika səviyyəli çempionatlarda məktəbimizi və Şəkini təmsil edirəm. Bir çox qalibiyyətlər qazanmışıq”.

Dəniz, həmçinin Olimpiada qalibi kimi riyaziyyat fənnindən finala yüksəlmiş şagirdlər üçün liseydə təhsil aldığı vaxtlarda nümunəvi dərslər təşkil edib.

Fevral ayında Dəniz BMT-nin Gənclərdən ibarət Məşvərət Şurasına üzv (UNYAC) seçilib. O bildirib ki, bu, 2025-ci ilin sonuna qədər nəzərdə tutulmuş bir fəaliyyət planıdır: “Bu müddət ərzində BMT ilə gənclər arasında əlaqələrin yaradılması, dialoq və tərəfdaşlığın genişləndirilməsi, gənclərin özləri haqda verilmiş qərarlar barədə fikirlərini BMT-yə çatdıra bilmək üçün çalışıram”.

Həkim ailəsində böyüyən Dəniz Məmmədzadə əlavə edib ki, iki ildən çox müddətdir tibbi görüntüləmə cihazları üzrə davam etdirdiyi araşdırma işi də var.

Xaricdə təhsil barədə öz düşüncələrini bizimlə bölüşən müsahibimiz deyib: “Hər bir şagirdin yiyələnmək, təhsil almaq istədikləri mühiti, ölkəni və ya universiteti öz istəkləri çərçivəsində müəyyənləşdirilmələri çox vacibdir. Bu, xüsusilə də bölgələrdə təhsil alan məktəblilərin qarşılaşdığı bir vəziyyətdir. Onlar nəinki müəllimləri və ailələri tərəfindən bu barədə dəstək görmək, hətta bəzən uğur qazanmaqda belə özlərinə inanmırlar. Əlbəttə, tərəddüd etmək çox təbii haldır, çünki rəqabət çox böyükdür. Amma bu o demək deyil ki, böyük hədəflər qoymaqdan çəkinmək lazımdır. O hədəflər üçün çalışmağın özü belə yaxşı təcrübələr və yeni fürsətlər qazandıran bir prosesdir. Sadəcə ilk addımları atmağa cəsarət etmək və hədəflərimiz uğrunda çox çalışmaq lazımdır”.

Dəniz Miçiqan Universiteti, Pensilvaniya kimi bir sıra universitetlərdən dəvət alıb. “Seçimim olan Nyu–Yorkda yerləşən, dünya üzrə “TOP7”də olan Kolumbiya Universiteti özünün ən nüfuzlu təqaüd proqramı “Egleston Scholars” proqramına layiq gördüyü tələbələrdən biriyəm. Bu Universitetə qəbul olunan tələbələrin yalnız bir faizinə verilən xüsusi alimlik-araşdırma təqaüdüdür. İlk ildən araşdırma işinə limitsiz imkanlar təmin edən çoxyönlü təqaüddür”.

Beləliklə Dəniz Məmmədzadə ilk seçimi olan Kolumbiya Universitetinin özəl təqaüdü hesabına təhsil dövrünün ilk illərindən etibarən önəmli elmi araşdırmaların tərkibində olacaq. Dəniz Kolumbiya Universitetində tibbi mikrobiologiya sahəsi üzrə təhsil alacaq.

Biz də bu yolda ona uğurlar arzulayırıq.